धनगढी- धनगढीस्थित सेती प्रादेशिक अस्पतालमा सिटीस्क्यान सेवा सुरु गरिएको छ । सुदूरपश्चिम प्रदेशका मुख्यमन्त्री त्रिलोचन भट्टले आइतबार सिटीस्क्यान सेवाको उद्घाटन गरेका हुन् ।
सिटीस्क्यान सेवाको उद्घाटन गर्दै मुख्यमन्त्री भट्टले प्रदेश सरकार आएपछि सेती प्रादेशिक अस्पताललगायत सरकारी अस्पतालमा थुप्रै लगानी भएको बताए । सेती अस्पतालमा प्रदेश सरकार बन्नुअघि गुणस्तरीय एक्सरे मेसिनसमेत नभएको अवस्थामा प्रदेश सरकार आएपछि नै ठूलो उपलब्धी भएको उनले बताए ।
सिटीस्क्यान मेसिन पनि प्रदेश सरकारकै लगानीमा जडान भएको भन्दै उनले थप उपकरणहरु पनि ल्याइन लागिएको जानकारी दिए । ‘प्रदेश सरकारकै बजेटमा आइसियु, भेन्टिलेटरलगायतका ठूला–ठूला उपकरण पनि भित्रिएका छन्,’ उनले भने, ‘अब एमआरआई मेसिनसमेत आउन लागेको छ ।’
उपकरण थप्ने विषयमा सरकार जहिले तयार रहेको बताउँदै भट्टले जनतालाई सेवा दिने विषयमा गम्भिरताका साथ सेवा दिन चिकित्सकलाई आग्रह गरे । चिकित्सकलाई भगवान सोचेर बिरामी सरकारी अस्पतालमा पुग्ने गरेको भन्दै उनले यो विश्वास भविष्यमा पनि कायम राख्न उनले आग्रह गरे ।
सात करोड बढी लागतमा अस्पतालले सिटीस्क्यान मेसिन खरिद गरेको अस्पतालका मेडिकल सुपरिटेन्डेन्ट डा. होराज पाण्डेले बताए । दक्ष जनशक्ती अभावका कारण खरिद भएको लामो समयसम्म सञ्चालन नभएको मेसिन मंगलबारबाट सञ्चालनमा आएको उनले बताए । यस अस्पतालले बाहिरको भन्दा आधा मूल्यमा सिटीस्क्यान सेवा दिइने उनले बताए ।
कार्यक्रममा बोल्दै अस्पताल व्यवस्थापन समितिका अध्यक्ष निर्मल शाहले पछिल्लो समय अस्पतालमा विभिन्न ठूला उपकरण थपिने काम भइरहेको बताए ।
प्रदेश सरकारकै सक्रियताका कारण उपकरण थपिएको उनले बताए । केही दिनभित्रै एमआरआई मेसिन पनि आउने र अस्पतालले थप सेवा दिने उनले बताए ।
उनका अनुसार सेती प्रादेशिक अस्पतालमा नर्सिङ कार्यक्रम सञ्चालन गर्ने तयारी पनि गरिएको छ । सेती प्रादेशिक अस्पतालले यहाँका स्वास्थ्य विषय पढ्न चाहाने विद्यार्थीहरुलाई शुलभ दरमा पठन पाठन गर्न सहज होस् भनेर सो कार्यक्रम ल्याउने पहल भइरहेको अध्यक्ष शाहले बताए ।
