धनगढी- कैलालीको कैलारी गाउँपालिका वडा नम्बर ६ मा आयोजना हुन लागेको ई लाइट कप फुटबल प्रतियोगिताको मिति सरेको छ । ई लाइट यूथ क्लबको आयोजनामा हुन लागेको कप यस अघि पुस २५ गते देखी हुने भनिएको थियो । विविध प्राविधिक कारण प्रतियोगिताको मिति सरेको पत्रकार सम्मेलन मार्फत क्लबले जानकारी दिएको हो ।

पुस २५ गतेबाट हुने भनिएको प्रतियोगिता अब माघ २० गतेबाट हुने क्लबका अध्यक्ष देवेन्द्र हमालले जानकारी दिएका छन् । प्रतियोगिताको मिति सरेसँगै अब पुरस्कार राशीपनि बढाएको हमालले बताए । प्रतियोगिताको विजेताले ५० हजार र उप विजेताले २५ हजार प्राप्त गर्ने जानकारी गराएको क्लबले अब मिति सरेसँगै पुरस्कार राशीपनि बढाएर विजेताले ७५ र उप विजेताले ३५ हजार नगद पुरस्कार पाउने अध्यक्ष हमालले बताए ।

१६ टिम सहभागी गराउने जानकारी गराएको क्लबले हालसम्म १६ टिम दर्ता भइसकेको जनाएको छ । अब थप टिम सहभागी गराउने पनि क्लबले निर्णय गरेको छ । प्रतियोगिता कैलारी गाउँपालिका वडा नम्बर ६ बनकट्टा खेलमैदानमा फुटबल आयोजना हुने जनाइएको छ ।

बिषेशगरी कैलारी गाउँपालिका र धनगढी उप महानगरपालिकाका खेलाडीहरूलाई समेटेर खुल्ला फुटबल प्रतियोगिता आयोजना गरिन लागेको अध्यक्ष हमालले बताए । कार्यक्रमको उद्घाटनमा थारु कलाकारहरू सहितको उपस्थितिमा सांस्कृतिक कार्यक्रम सहित भव्य कार्यक्रमका बिच प्रतियोगिताको उद्घाटन गरिने आयोजकले बताएको छ ।

आयोजक क्लब ई लाइट यूथ क्लावका सह सचिव राम बहादुर विकले कैलारी गाउँपालिका ६ का सबै युवाहरूलाई समेटेर क्लब गठन गरेको र अब खेलकुद सँगै शिक्षा, स्वास्थ्य, सरसफाइ लगायतका क्षेत्रमापनि क्लब काम गर्ने बताए ।

क्लबका सचिव विजय चौधरीले यस प्रतियोगिताबाट जिल्ला, प्रदेश तथा राष्ट्रिय स्तरका प्रतियोगितामा समेत यहाँका खेलाडीको सहभागिता बढ्ने अपेक्षा लिएको बताए । साथै उत्कृष्ट खेलाडीलाई ५ हजार, उत्कृष्ट किपर, स्कोरलाई नगद २ हजार पुरस्कार रहेको उनले बताए ।