धनगढी, चैत्र १०
धनगढीमा बिहीबार (आज)देखि सुदूरपश्चिम महोत्सवको १५औं संस्करण सुरु हुँदैछ । कैलाली उद्योग वाणिज्य संघ कैलालीको आयोजनामा विहीबारदेखि धनगढी उपमहानगरपालिका वडा नम्बर १ स्थित पशुपति टोलमा महोत्सव सुरु हुन लागेको हो । संघले बुधबार धनगढीमा पत्रकार सम्मेलनको आयोजना गर्दै महोत्सवको सबै तयारी पूरा भएको जानकारी दिएको हो ।

२० गतेसम्म चल्ने महोत्सवको उद्घाटन विहीबार दिउँसो २ बजे सुदूरपश्चिम प्रदेशका मुख्यमन्त्री त्रिलोचन भट्टले गर्ने कैलाली उद्योग वाणिज्य संघका अध्यक्ष पुष्पराज कुँवरले जानकारी दिए । महोत्सव उद्घाटनअघि बिहान १० बजे प्रभातफेरि कार्यक्रमको आयोजना गरिएको उनले बताए । महोत्सवमा करिब दुई करोडको लगानी सञ्चालन हुने आयोजकले जनाएको छ । ११ दिनसम्म सञ्चालन हुने महोत्सवमा करिब १० करोड बराबरको कारोबार हुने अनुमान गरिएको अध्यक्ष कुँवरले बताए ।

महोत्सवमा कृषि, जडिवुटी, हस्तकला, फर्निचर, अटोमोवाइल्स, गारमेन्ट, इलेक्टोनिकल, होटल र सुचना प्रविधि गरि २५० स्टलहरु रहने छन् । पहिलेका वर्षहरुभन्दा फरक ठाउँमा महोत्सव हुन गइरहेकाले सुरक्षा व्यवस्थालाई चुस्त गराइदिन आयोजकले सुरक्षा निकायसंग अनुरोधसमेत गरेको जनाएको छ । सुरक्षाको दृष्ट्रिकोणले पूर्णरुपमा अत्याधुनिक सीसी क्यामराले निरिक्षण गरिनेछ भने निजी र सरकारी सुरक्षाकर्मीहरुको व्यवस्था गरिएको अध्यक्ष कुँवरले जानकारी दिए ।

महोत्सवको मुख्य प्रवद्र्धकका रुपमा सुदूरपश्चिम प्रदेश सरकार रहेको छ, प्रर्वद्धक धनगढी उपमहानगरपालिका रहेको छ । त्यसैगरि मुख्य प्रायोजकका रुपमा यशोदा फुड्स प्रालि रहेको छ । महोत्सवमा स्थानीय उत्पादन र महिला उद्यमीलाई प्रोत्साहन गरिएको संघका अध्यक्ष कुँवरले बताए । ‘ वृहत व्यवसायीक कृषि प्रदर्शनी तथा प्रतियोगिता ताजा तरकारी र कृषिमा आएको प्रविधि संगै माछा, केरा, पोल्ट्री, दुग्धजन्य पदार्थ, च्याउ आदी व्यवसायलाई प्रदर्शनीमा विशेष जोड’ उनले भने ।

२०६३ सालदेखि विभिन्न बुँदे माग राख्दै आएको सुदूरपश्चिम महोत्सवमा यस वर्ष भने एक सुत्रीय माग मात्रै अघि सारिएको छ । कैलाली उद्योग वाणिज्य संघका अध्यक्ष कुँवरले यस वर्षको महोत्सवमा सुदूरपश्चिम सरकारलाई एक मात्र माग राखिने बताए । धनगढीमा प्रदर्शनी स्थलको व्यवस्थापनका लागि एक सुत्रीय माग राखिने उनले बताए । यस वर्ष महोत्सव राति ८ बजेसम्म सञ्चालन हुनेछ । महोत्सवमा राष्ट्रिय तथा स्थानीय कलाकारहरुको प्रस्तुती रहने छ ।

महोत्सवलाई सम्पन्न गर्न मुल समिति सहित २१ उप समिति गठन गरिएका छन् । यस वर्षको महोत्सव करिब चार लाख व्यक्तिले अवलोकन गर्ने अनुमान गरिएको छ ।