काठमाडौं, चैत १७
त्रिदेशीय ट्वान्टी–२० अन्तर्राष्ट्रिय शृंखलामा नेपालले आज पपुवा न्युगिनी (पीएनजी) विरुद्ध प्रतिस्पर्धा गर्दैछ ।
जारी शृंखलामा पीएनजीविरुद्ध नेपालको यो दोस्रो खेल हो । पहिलो खेलमा नेपालले पीएनजीलाई १५ रनले पराजित गरेको थियो । पीएनजीले शृंखलामा दुई खेल खेलेको छ । दुबै खेलमा पराजित भएको छ । पीएनजी मलेसियाविरुद्धको दोस्रो खेलमा पनि आठ रनले पराजित भएको थियो ।
नेपाल भने यसअघि खेलेका दुबै खेल जितेको छ । नेपालले मलेसियालाई ६ विकेट पराजित गरेको थियो । आजको खेल जितेमा नेपालले एक खेलअघि नै फाइनलमा स्थान बनाउनेछ । पीएनजी अंकबिहीन छ । मलेसियाले दुई अंक जोड्दा नेपालले चार अंक जोडेको छ ।
ट्वान्टी–२० अन्तर्राष्ट्रिय क्रिकेटमा नेपाल र पीएनजीले दुई पटक प्रतिस्पर्धा गरेका छन् । दुईमध्ये एक खेल नेपालले जितेको छ भने अर्को खेलमा पीएनजी विजयी भएको छ ।
कीतिपुरस्थित त्रिवि क्रिकेट मैदानमा १२ः३० बजे हुने खेल नेपालको ५०औं ट्वान्टी–२० अन्तर्राष्ट्रिय खेल हो । नेपालले पहिलो ट्वान्टी–२० अन्तर्राष्ट्रिय क्रिकेट बंगलादेशमा सम्पन्न २०१४ को विश्वकपमा खेलेको थियो । हङ्कङविरुद्धको पहिलो ट्वान्टी–२० अन्तर्राष्ट्रिय खेलमा नेपाल ८० रनले विजयी भएको थियो ।
पहिलो खेलको टिममा रहेका सोमपाल कामी आज पीएनजीको खेलमा पनि हुनेछन् । नेपालले अहिलेसम्म खेलेका ४९ मध्ये २७ खेलमा विजय हासिल गरेको छ । नेपालले सबैभन्दा धेरै खेल नेदरल्यान्ड्सविरुद्ध खेलेको छ । नेदरल्यान्ड्सविरुद्ध ९ मध्ये चार खेल जितेको छ भने चार खेल हारेको छ । एक खेल नतिजाबिहीन बनेको छ ।
