धनगढी- नेपाली काङ्ग्रेस सुदूरपश्चिम प्रदेश संसदीय दलका नेता कमलबहादुर शाहले प्रदेश मुख्यमन्त्री राजेन्द्रसिंह रावललाई तत्काल पदबाट राजीनामा दिन माग गरेका छन् । नेता शाहले नियुक्त भएको तीन साता बढी भइसक्दा पनि विश्वासको मत लिन नसक्ने मुख्यमन्त्रीले राजीनामा दिएर निकास दिनुपर्ने बताए ।
शनिवार आफ्नो गृह क्षेत्र कैलालीको लम्कीमा नेपाल प्रेस युनियन, अलम्कीले आयोजना गरेको कार्यक्रममा काङ्ग्रेस प्रदेश संसदीय दलका नेता शाहले तीन साता बढीदेखि सदन समेत चल्न नसकेको औँल्याउँदै प्रदेश सभालाई अनिर्णयको बन्दी नबनाउन पनि आग्रह गरे ।
उनले भने– तीन साता बढी भइसक्यो, तर सदन चलेको छैन । सदन अनिर्णयको बन्दी बनेको छ । जनताका सवालहरूले प्रवेश पाउन सकेका छैनन् । त्यसैले मुख्यमन्त्रीले पदबाट राजीनामा दिएर निकास दिनु पर्छ ।
अर्को प्रसङ्गमा नेता शाहले जेल चलान भएका नागरिक उन्मुक्ति पार्टीका सांसद अरुणकुमार चौधरीलाई रिहा गर्न सरकारसँग माग गरे । उनले तत्कालीन समयमा थरुहट र सरकार बिच भएको सम्झौता कार्यान्वयन गर्न समेत माग गरे । भने– विभिन्न कालखण्डमा आन्दोलनकारी र सरकार बिच सम्झौता भएका छन् । सरकारले ती सम्झौताहरू कार्यान्वयन गर्नुपर्छ ।
उनले नागरिक उन्मुक्ति पार्टीले उठाएका सवालहरू जायज भएको जिकिर गरे । उनले काङ्ग्रेसले जहिले पनि थारु समुदायका हक अधिकारका सवाललाई गम्भीरतापूर्वक लिएको चर्चा गरे ।
सुदूरपश्चिम प्रदेशमा नागरिक उन्मुक्ति पार्टीको समेत समर्थनमा नेकपा एमाले नेतृत्वको सरकार गठन भए पनि मुख्यमन्त्री रावलले अझै विश्वासको मत लिएका छैनन् । संवैधानिक व्यवस्थाअनुसार उनले आगामी २६ गतेभित्र प्रदेश सभामा विश्वासको मत लिनुपर्ने छ ।
सरकार गठनका वेला समर्थन गरेको भए पनि नागरिक उन्मुक्ति पार्टीले आफ्ना मागहरू पुरा नभएसम्म विश्वासको मत नदिने बताउँदै आएको छ । नागरिक उन्मुक्तिले टीकापुर घटनामा अदालतबाट आजीवन जेल सजाय पाएका रेशमलाल चौधरीको रिहाइलाई मुख्य माग बनाउँदै आएको छ ।
प्रदेश सभामा सात सिट रहेको नागरिक उन्मुक्ति पार्टीको समर्थनबिना कुनै पनि सरकार बन्न नसक्ने अवस्था रहेको छ ।
