धनगढी – सुदूरपश्चिम प्रदेशका नव नियुक्त मुख्यमन्त्री कमलबहादुर शाहले स्थिर प्रदेश सरकार निर्माण गर्न सबैसंग खुला छलफल गर्ने बताएका छन् । शुक्रबार पद तथा गोपनीयताको शपथ ग्रहण गरेका उनले पदभार ग्रहण गर्दै यस्तो बताएका हुन् ।
‘हामी सबै दलसंग छलफल गरेर अघि बढ्छौं, स्थिर प्रदेश सरकारका लागि पहल गर्छौं,’ उनले भने, विश्वासको मत लिने कुरामा हामी ढुक्क छौँ । मन्त्रिपरिषद्ले छिटो भन्दा छिटो पूर्णता पाउँछ ।’
भ्रष्टाचार नियन्त्रण पहिलो प्रथमिकता
मुख्यमन्त्री शाहले आफ्नो पहिलो प्राथमिकता सरकारमा भएको अनियमितता र भ्रष्टाचारलाई नियन्त्रण रहेको बताएका छन् । भ्रष्टाचार सम्बन्धी धेरै कुरा बाहिर आएका कारण यसलाई पहिलो प्राथमिकता राखेका उनले बताए ।
प्रदेश सरकार मातहत हुने कार्यायोजना तर्जुमा गर्न प्रदेश सरकारले एक समिति बनाउने मुख्यमन्त्री शाहले बताए । चुनौतीसँगै जित्दै जनताले अनुभूती लिने गरि काम गर्ने उनले बताए ।
