धनगढी- कैलाली उद्योग वाणिज्य संघका अध्यक्ष पुष्पराज कुँवरले नेपाल उद्योग वाणिज्य महासंघकै विरुद्धमा आन्दोलन गर्नुपर्ने अवस्था आएको बताएका छन् । आगामी आन्दोलनका कार्यक्रम तय गर्ने उद्देश्यले शनिबार धनगढीमा आयोजित कार्यक्रममा बोल्दै उनले उद्योगी व्यापारीका विषयमा महासंघले कुनै पनि आवाज उठाउन नसकेको र मागको सुनुवाई गर्न नसकेको भन्दै महासंघविरुद्ध नै आन्दोलन गर्नुपर्ने अवस्था आएको उनले बताएका हुन् ।
नयाँ सरकार आएपछि बैंकको व्याजदर घटाउनुपर्नेलगायतका उद्योगी व्यवसायहरुका समस्या समाधान हुनेमा आशावादी भएपनि अहिलेसम्म कुनै सम्बोधन हुन नसकेको उनले बताए । राष्ट्र बैंकले केही कुराहरु परिर्वतन गरेको भएपनि अहिलेसम्म लागू हुन नसकेको उनले बताए ।
चालु कर्जा खारेज नै गर्नुपर्ने आफूहरुले माग रहेको अध्यक्ष कुँवरले बताए । प्रदेशका सबै उद्योग वाणिज्य संघहरु एक ठाउँमा उभिन आवश्यक रहेको भन्दै उनले भने, ‘आगामी दिनमा चरणबद्ध आन्दोलनका कार्यक्रममहरु अगाडि बढाउनुपर्छ ।’
