धनगढी- शनिबारदेखि बुटवलमा सुरु हुने तिलोत्तमा गोल्डकप नकआउट फुटबल प्रतियोगिताको उद्घाटन खेलमा सुदूरपश्चिम ११ र रुपन्देही ११ भिड्दै छन् । रुपन्देहीको बुटवलमा चैत ४ गतेदेखि ११ गतेसम्म हुने २२ औं संस्करणको सो प्रतियोगितामा खेल्न सुदूरपश्चिम ११ को खेलाडी टोली शुक्रबार बुटवल प्रस्थान गरेको छ ।
टोलीलाई कैलाली जिल्ला खेलकुद विकास समितिका अध्यक्ष ललित खत्री, क्षेत्रिय खेलकुद विकास समितिका प्रमुख टोप विष्ट, सुदूरपश्चिम ११ स्पोट्र्स क्लवका अध्यक्ष सुरेश हमाललगायत क्लवका सदस्यहरुले विदाई गरेका थिए । सुप ११ ले सुदूरपश्चिमको प्रतिनिधित्व गर्दै देश तथा विदेशका फुटबल प्रतियोगितामा खेल्ने गरेको छ ।
मोफसलको पुरानो मानिने तिलोत्तमा गोल्डकपको स्थापना २०३१ सालमा तत्कालीन बुटवल नगर पञ्चायतले गरेको थियो। यो प्रतियोगिताको रूपन्देही जिल्ला फुटबल संघले आयोजना गरेको छ ।
प्रतियोगितामा आयोजक रूपन्देही ११, नेपाल पुलिस, एपिएफ, मनाङ मर्स्याङ्दी, थ्री स्टार, फ्रेन्ड्स क्लब, हिमालयन शेर्पा र सुदूर पश्चिम ११ गरी आठ टिमले प्रतिस्पर्धा गर्दैछन्।
