काठमाडौं- नेपाली कांग्रेसमा मन्त्री बन्न नेताहरुबीच हानथाप सुरु भएको छ । मन्त्रीका आकांक्षी धेरै भएपछि सभापति शेरबहादुर देउवालाई सकस भएको छ । मन्त्री छनोटमा आन्तरिक सन्तुलन मिलाउन उनलाई हम्मेहम्मे परेको छ । माओवादी केन्द्रका अध्यक्ष पुष्पकमल दाहाल प्रचण्ड नेतृत्वको सरकारमा कांग्रेस ८ मन्त्रालय लिएर सहभागी हुने तयारीमा छ ।

संसदीय दलको निर्वाचनमा ६४ जना सांसदले देउवालाई साथ दिएका थिए । गगन थापा समूहको भनेर चिनिने सांसदले पनि मन्त्रीको बार्गेनिङमा संसदीय दलको नेतामा देउवालाई मत दिएको कांग्रेस वृत्तमा चर्चा थियो । आफ्नो पक्षमा ३२ जना सांसदको हिसाब गरेका थापाले २५ मत मात्र पाएका थिए ।

देउवाका प्रमुख स्वकीय सचिव भानु देउवाका अनुसार मन्त्री बन्न सांसदहरुको चर्को दबाब छ । कांग्रेसमा गुटगत सन्तुलन मिलाएर मन्त्री बनाउने परम्परा रहँदै आएको छ । अहिले पनि देउवालाई शेखर कोइराला–गगन थापा समूहलाई हिस्सा दिनुपर्ने बाध्यता छ । शेखर–गगन समूहले ३ मन्त्रालयको दाबी गरेको छ । आफूसँगै रहेका प्रकाशमान सिंह, विमलेन्द्र निधि, कृष्णप्रसाद सिटौला र शशांक कोइरालाको माग पनि देउवाले सम्बोधन गर्नुपर्ने छ ।

कांग्रेसको शेखर – गगन समूहबाट उपसभापति धनराज गुरुङ मन्त्री बन्ने निश्चित जस्तै छ । यस्तै बद्री पाण्डे, जीवन परियार, तेजुलाल चौधरी, डिगबहादुर लिम्बु, सञ्जय गौतम लगायत पनि मन्त्री बन्न तीव्र लबिङमा छन् । चौधरीप्रति राष्ट्रपति पौडेलको पनि सद्भाव छ ।

अर्थ मन्त्री बन्न उपसभापति खड्का, प्रवक्ता महत र नेता उदयशम्शेर राणाबीच हानथाप छ । कांग्रेस नेता शशांक कोइरालाले दीपक खड्कालाई मन्त्रीका लागि देउवा समक्ष सिफारिस गरेका छन् । आफू भने देउवा नेतृत्वको सरकार बन्दा मात्र मन्त्री बन्ने कोइरालाले निकटस्थलाई बताउने गरेका छन् । आफू मन्त्री नबनेको अवस्था प्रकाशमान सिंहले पनि राजन केसीलाई मन्त्री बनाउने चर्चा छ । आफ्नो कोर टिमभित्र पनि सभापति देउवालाई मन्त्री छान्न सकस छ ।

पार्टीभित्रको सन्तुलन मिलाउँदा देउवासँग जोडिएको चार जना मात्र मन्त्री हुने अवस्था देखिन्छ । तर न उपसभापति पूर्णबहादुर खड्का, प्रवक्ता प्रकाशशरण महत, नेताहरू एनपी साउद, किशोरसिंह राठौर, मोहन बस्नेत, शंकर भण्डारी, रमेश रिजाल, उदयशम्शेर राणा, सीता गुरुङ, श्याम घिमिरे, वीरबहादुर बलायरको दाबी चर्को छ ।

कांग्रेसमा प्रभावशाली मन्त्रालयको जिम्मेवारी सम्हाल्न पनि नेताहरुबीच हानथाप छ । कांग्रेसले अर्थ मन्त्रालयमाथि निर्विकल्प दाबी राखेको छ । अर्थ मन्त्री बन्न उपसभापति खड्का, प्रवक्ता महत र नेता उदयशम्शेर राणाबीच हानथाप छ ।

बाँकी मन्त्रालयबारे भने कांग्रेसले विकल्प राखेको छ । परराष्ट्र वा भौतिक, शिक्षा वा स्वास्थ्य, भूमिसुधार वा सहरी विकास, कानुन वा रक्षा, उद्योग वा ऊर्जा मन्त्रालय लिने कांग्रेसको आन्तरिक रणनीति छ । मन्त्री बन्न उत्कट आकाङ्क्षा राखेका शीर्ष नेताहरूको नजर महत्त्वपूर्ण मन्त्रालयमाथि छ ।