धनगढी – कैलालीको गौरीगङ्गा नगरपालिकामा मंगलबारदेखि जगशक्ति गोल्ड टीएमटी तेस्रो सुदूरपश्चिम गौरीगङ्गा गोल्ड कप २०७९ सुरु भएको छ । मंगलबार भएको उद्घाटन खेलमा डोटीलाई ३–१ ले पराजित गर्दै आयोजक गौरीगङ्गा–११ स्पोर्ट्स क्लब क्वाटरफाइनलमा प्रवेश गरेको छ ।
उद्घाटन खेलमा पुनरागमन जित निकाल्दै आयोजक क्वाटरफाइनलमा पुगेको हो । खेलको ११औँ मिनेटमा डोटीका हेरी सिंहले गोल गर्दै अग्रता बनाएका थिए । ४०औँ मिनेटमा गौरीगङ्गाका गणेश लुहारले गोल गर्दा पहिलो हाफको खेल बराबरीमा सकियो ।
दोस्रो हाफको ७६औँ मिनेटमा डी बक्सभित्र गौरीगङ्गाका खेलाडीमाथि फल भएपछि पाएको पेनाल्टीमा दिनेश थापाले पेनाल्टीमार्फत गोल गर्दै खेललाई २–१ को स्थितिमा पुर्याए । खेलको ८१औँ मिनेटमा जनक साउदले गोल गर्दै टिमलाई सहज जित दिलाए । खेलको प्लेयर अफ दी म्याच साउद चुनिए ।
‘खेलौँ फुटबल रमेर, खेलकुदको सन्देश, शान्ति स्थायित्व र एकताबद्ध देश’ भन्ने नाराका साथ गौरीगङ्गा–११ स्पोर्टस क्लबको आयोजनामा सुरु भएको प्रतियोगिताको आजै सुदूरपश्चिमका प्रदेश प्रमुख देवराज जोशीले उद्घाटन गरेका थिए ।
प्रदेश प्रमुख जोशीले खेलकुद क्षेत्र व्यावसायिक बन्न नसकेको बताए । उनले भने, ‘खेलकुदप्रति युवाहरूको आकर्षण बढ्दै गएको छ । तर, व्यावसायिक नबन्दा खेलाडीहरूलाई जीविकोपार्जन गर्न समस्या भएको छ ।’
आयोजक गौरीगङ्गा–११ सँगै कैलाली, कञ्चनपुर, डोटी, बाजुरा, बाँके, बर्दिया, नवलपरासी जिल्लाका टिमहरूका साथै नेपाल पुलिस र सशस्त्र प्रहरी बलको टिमको सहभागिता रहेको छ ।
प्रतियोगिताको विजेतालाई ट्रफीसहित नगद ४ लाख र उपविजेतालाई ट्रफीसहित नगद २ लाख पुरस्कार प्रदान गरिने छ । सर्वोत्कृष्ट खेलाडीलाई नगद ५० हजार प्रदान गरिने आयोजकले जानकारी दिएको छ ।
त्यस्तै सर्वाधिक गोलकर्ता, उत्कृष्ट गोलरक्षकलगायत विभिन्न विधाका उत्कृष्ट खेलाडीलाई विधागत रूपमा १० हजार पुरस्कार दिइने छ भने प्रतियोगिताको ‘म्यान अफ द म्याच’लाई ५ हजार प्रदान गरिने आयोजकले जनाएको छ । चैत ३० सम्म सञ्चालन हुने प्रतियोगितामा १० टिमको सहभागिता छ ।
