काठमाडौँ – राजधानीमा जारी शहीद स्मारक ए डिभिजन लिगमा बिहीबार साविक विजेता मछिन्द्र फुटबल क्लब हिमायन शेर्पासँग रोकिँदा अर्को खेलमा थ्रीस्टार विजयी भएको छ । भुटानी कप्तान चेन्चो ग्याल्सेनसहित मैदान उत्रिएको साविक विजेता मछिन्द्र फुटबल क्लब बिहीबार हिमालयन शेर्पा क्लबसँग १–१ को बराबरीमा रोकिएको हो ।

अर्को खेलमा थ्रीस्टार क्लबले विभागीय टोली त्रिभुवन आर्मी क्लबमाथि १–० को संघर्षपूर्ण जित निकाल्यो ।

एन्फा कम्प्लेक्समा भएको हिमालयन शेर्पाले सुरुवाती अग्रता लिएको थियो । तर अन्तिम चार मिनेटमा अग्रता कायम राख्न नसक्दा हिमालयन बलियो मछिन्द्रसँग अंक बाँड्न बाध्य भएको हो । निकै रोमाञ्चक र प्रतिस्पर्धात्मक बनेको खेलमा दुवै टोलीले पहिलो हाफ गोलरहित बराबरी खेलेका थिए ।

दोस्रो हाफमा अंक जोड्ने लक्ष्यका साथ आक्रामक खेलेका दुवै टोलीले केही राम्रा अवसर बनाए पनि बललाई पोस्टको दिशा दिन असफल भएका थिए । अन्तिमतिर काउन्टरको प्रयास गरेको हिमालयनले निर्धारित खेल सयम सकिन ४ मिनेट बाँकी रहँदा सत्यम शर्माले पेनाल्टीबाट अग्रता दिलाएका थिए ।

निशान लिम्बूको प्रहार मछिन्द्रका रक्षक छिरिङ गुरुङको हातमा लागेपछि हिमालयनले पेनाल्टीको अवसर पाएको थियो । उक्त अवसरमा सत्यमले सहजै गोलमा परिणत गर्दा हिमालयनले अग्रता पाएको थियो । पछि परेसँगै खेलमा फर्किने प्रयासमा रहेको मछिन्द्रले इन्जुरी समयमा गोल गर्दै हारको संकट टार्‍यो । विमल घर्ती मगरले गोल गर्दै टोलीको हारलाई बचाएका हुन् । यस बराबरीसँगै हिमालयनले ६ खेलमा ६ अंक जोड्दा मछिन्द्रको पनि समान खेलमा ६ अंक नै छ ।

लिगअन्तर्गत बिहीबार नै भएको अर्को खेलमा थ्रीस्टारले विभागीय टोली त्रिभुवन आर्मीमाथि १–० को रोमाञ्चक जित निकाल्यो । थ्रीस्टारलाई स्पस्ट अंक दिलाउने क्रममा फरवार्ड मार्टिन कायोडे अजाइले पहिलो हाफमा गरेको गोल नै निर्णायक बनेको हो ।

च्यासल मैदानमा सम्पन्न खेलमा थ्रीस्टारले १७ औं मिनेटमा अग्रता लिएको थियो । काउन्टरको प्रयास गरेको अवस्थामा अजाईले कप्तान विक्रम लामाले उपलब्ध गराएको पासलाई जाली चुमाउन सफल भएका थिए । त्यसपछि आर्मी खेलमा फर्किनका लागि निकै संघर्ष गरे पनि सफल हुन सकेन । यद्यपि दुवै टोलीले गोलका लागि केही राम्रा अवसर सिर्जना गरे पनि सदुपयोग गर्न सकेनन् । राष्ट्रिय टोलीमा अटाएका खेलाडी भए पनि आर्मीले अपेक्षाअनुसारको प्रदर्शन गर्न सकेन र अंक सुम्पिन बाध्य भयो ।

यससँगै थ्रीस्टारले ६ खेलबाट लिग तालिकामा १० अंक जोडेको छ । उता पराजय भोगेको आर्मीको समान खेलबाट ८ अंक छ । सातौं चरणमा थ्रीस्टारले चैत २७ गते मनाङमस्र्याङ्दी तथा आर्मीले चैत २६ गते सातदोबाटो युथ क्लबको सामना गर्नेछ ।
लिगमा शुक्रवार पनि दुई खेल हुनेछन् । च्यासल मैदानमा मनाङ मस्र्याङ्दी फुटबल क्लव र फ्रेण्ड्स क्लव तथा एन्फा मुख्यालयमा खुमलटार युथ क्लव र जावलाखेल युथ क्लवबीच प्रतिष्पर्धा हुनेछ ।