धनगढी । कैलालीको धनगढीस्थित फाप्ला क्रिकेट मैदानमा हुने आठौं संस्करणको लिटल फ्लावर प्रिमियर लिग (एलपीएल–८ सिनियर क्रीकेट प्रतियोगिता) को टिम इन्ट्री खुला गरिएको छ ।

प्रतियोगिताका सात ओटा संस्करण विद्यालय स्तरीय रुपमा संचालित भएपनि यो संस्करण देखि एलपिएल सिनियर( खुला) प्रतियोगिताको रुपमा संचालन गर्न लागिएको हो।

देशभरबाट उत्कृष्ट क्रीकेट एकेडेमीहरु, कलेजहरु र आफ्नै क्रीकेट टिम भएका विद्यालयहरुले प्रतियोगिता मा सहभागिता जनाउन पाउने छन्। प्रतियोगिता टी–२० फर्म्याटमा खेलाईने भएको हो।

यो संस्करणको विजेतालाई २ लाख ५५हजार ५ सय ५५ र उपविजेतालाई १ लाख २८ हजार नगदसहित ट्रफी, मेडल र प्रमाण पत्र प्रदान गरिनेछ । प्रतियोगिताको सर्वोत्कृष्ट खेलाडीले नगद २० हजार, उत्कृष्ट बलर र ब्याट्सम्यानले १०/१० हजार नगदसहित ट्रफी, मेडल र प्रमाण पत्र प्राप्त गर्नेछन् । त्यस्तै उदयमान खेलाडीलाई नगद ५ हजार र प्रत्येक खेलको प्लेयर अफ दी म्याचलाई नगद सहित ट्रफी, मेडल र प्रमाणपत्र प्रदान गरिनेछ।प्रत्येक टिमले आफ्नो टिममा नेपालको क्रीकेट टिमबाट खेलिरहेका र खेलिसकेका खेलाडी समेत समावेश गर्न पाउनेछन् ।
प्रतियोगिताको एचडी टेलिभिजन मार्फत प्रत्यक्ष प्रशारण गरिने छ।

प्रतियोगितामा सहभागी हुन चाहने क्रीकेट टिमहरुले क्रीकेट कल्चरको पालना गर्नु अनिवार्य गरिएको छ।
प्रतियोगितामा सहभागी टिमहरुमध्येबाट सबैभन्दा अनुशासित टिमलाई फेयर( Fair Play)टिम समेत घोषणा गरिने छ। प्रत्येक टिममा १५ जना खेलाडी १ जना कोच र १ जना म्यानेजर गरि १७ जनाको squad रहनेछ।