काठमाडौं- नेपालका कप्तान रोहित पौडेल एसिया कपमा भारतविरुद्ध आउट भएका छन् । स्पिनर रविन्द्र जडेजाको २० औं ओभरको अन्तिम बलमा रोहित पौडेल एज लागेर रोहित शर्माबाट क्याच आउट हुन पुगे ।
पालेकेले इन्टरनेशल क्रिकेट स्टेडियममा टस हारेर पहिला ब्याटिङको निम्तो पाएको नेपालले २० ओभरमा ३ विकेट गुमाउँदै ९३ रन बनाएको छ । आसिफ शेख ७१ बलमा ३ चौकासहित ३९ रनमा क्रिजमा छन् ।
उनलाई कुशल मल्लले साथ दिनेछन् । ओपनर कुशल भुर्तेलले २५ बलमा ३ चौका र २ छक्कासहित ३८ रन बनाउँदै आउट भएका थिए । कुशल शार्दुल ठाकुरको दशौं ओभरको पाँचौं बलमा विकेटकिपर ईशान किशनबाट क्याच आउट हुन पुगे ।
१९ औंओभरको अन्तिम बलमा आसिफ शेखलाई अम्पायरले आउट दिएका थिए । तर आसिफले रिभ्यु लिएपछि बल स्टम्प मिस देखिदा बचेका थिए ।
पहिलो विकेटका लागि आसिफ शेख र कुशल भुर्तेलले ९.५ ओभरमा ६५ रनको साझेदारी गरेका थिए । पावर प्लेमा ६५ रन जोडेपनि नेपालले कुशल भुर्तेल आउट भएपछि रन जोड्न केहि संघर्ष गरेको थियो । स्पिनर रविन्द्र जडेजाको १६ औं ओभरको अन्तिम बलमा भीम सार्की इनसाइड एज लाग्दै ७ रनमा बोल्ड आउट भए ।
