धनगढी – कैलालीको धनगढीमा तेस्रो निर्माण सामाग्री तथा हार्डवेयर एक्सपो २०८० भोली असोज १० गतेदेखि सुरु हुँदैछ । कैलाली हार्डवेयर संघको आयोजनामा असोज १० गतेदेखि चार दिनसम्म धनगढीस्थित होटेल सौराईं स्क्वायर प्यालेसमा सो एक्सपो सञ्चालन हुनेछ । कैलाली हार्डवेयर संघले व्यवसायीका र बस्तुगत बजार विकासका लागि २०७५ सालदेखि सुरु भएको एक्सपो कोभिड महामारीका कारण प्रभावित भएको थियो । यो पटक आयोजना हुन लागेको एक्सपोको तयारी लगायत विविध विषयमा केन्द्रित रहेर निशाना न्युजले संघका अध्यक्ष कुबेरबहादुर शाहीसँग गरेको कुराकानीका सारसंक्षेप यहाँ प्रस्तुत गरिएको छ ।

१. तेस्रो निर्माण सामाग्री तथा हार्डवेयर एक्सपो २०८० को तयारी के कसरी भइरहेको छ ?
भोलीदेखि सुरु हुन गइरहेको हार्डवेयर एक्सपोको तयारी पूरा भएको छ । स्टल बुकिङको काम सबै भइसकेको छ । प्रदेशका सात वटै जिल्लामा हामी घर घर पुगेर हार्डवेयर एक्स्पोको बारेमा सम्झाउदै निम्तो पनि दिइसकेका छौं ।
२. खासगरी यो एक्सपो गर्नुको मुख्य कारण चाहि के हो ?
हाम्रो उद्देश्य भनेको कुनै पनि निर्माण सङ्ग सम्बन्धित सरोकारवाला ९आम उपभोक्ता९ग्राहक०, व्यवसायी, उत्पादक कम्पनी, डिलर, डिस्ट्रीब्युटर, प्राविधिक, ईन्जिनियर, ओभरसियर, डिजाईनर, वास्तु विज्ञ, ठेकेदार, मिस्त्री, प्रदेश सरकार, स्थानीय सरकार, निर्माणसंग सम्बन्धित कार्यालयहरु लगायत सम्पूर्णलाई हार्डवेयर एक्स्पोको बारेमा बुझाउने हो ।
हार्डवेयर एक्सपो २०८० भनेको हालसम्म चलिरहेका, प्रयोग भैइरहेका, हामीले देखेका सुनेका र परम्परागत निर्माण सामग्री तथा निर्माण प्रविधि भन्दा केहि फरक र नविनतम आयामहरु आमजनमानसमा बुझाउनु नै हो ।
३. एक्सपोमा मुख्य आकर्षण चाहि के हो ?
पूर्वाधार निर्माणका लागि चाहिने सरिया, सिमेन्ट, सेक्सन, जिआइतार, टायल्स तथा होम डेकोरेसनको लागि चाहिने सबै सामानहरू अवलोकनकर्ताको सामु प्रत्यक्ष रूपमा प्रदर्शन गरिनुका साथै इन्जिनियर, आर्किटेक्चर, आन्तरिक डिजाइनर , विभिन्न इन्जिनियरिङ सम्बन्धी जानकारी लिन सकिनेछ । एक्सपोमा देशका विभिन्न स्थान तथा बाह्य राष्ट्रका गरी हार्डवेयर कम्पनीका व्यवसायीहरूको स्टल रहने छ ।
४. एक्सपोका अरु विशेषता छन् कि ?
एक्सपोमा अवलोकन गर्न चाहनेलाई प्रवेश निशूल्क गरिनुका साथै स्टलमा खरिद गर्दा छुटसहितको योजना तथा लक्की ड्रमार्फत अवलोकन कर्तामध्ये पाँच जनालाई आकर्षक पुरस्कार र अन्तिम दिन तीन जना भाग्यमानी अवलोकन कर्तालाई बम्पर उपहार प्रदान गरिनेछ । एक्सपोमा नयाँ प्रविधि, उपकरण र मेसिनहरू रहनुका साथै वास्तु विज्ञबाट निशूल्क परामर्श, सामानको गुणस्तर र मूल्यको तुलना गर्दै उत्कृष्ट सामाग्री छनौट गर्न सकिनेछ । भूकम्प प्रतिरोधी निर्माण सम्बन्धी जानकारी लिन सकिनेछ ।
५. अन्त्यमा, तपाईहरुले आयोजना गर्न लागेको एक्सपोले के सन्देश दिन खोजेको हो ?
सुदूरपश्चिम सम्भावनाको क्षेत्र हो । हामीले सञ्चालन गर्ने एक्सपोले यस प्रदेशमा लगानी गर्ने वातावरण बन्न सक्छ । अर्थतन्त्रमा महत्वपूर्ण योगदान पुग्नेछ । आर्थिक मन्दी भएका बेला हामीले यो कार्यक्रमको आयोजना गरेका छौं । आर्थिक गतिविधिका सहयोग पुर्याउनेछ भन्ने हामीले विश्वास लिएका छौं । अहिले रोजगारीको खोजीमा युवापलायन बढ्दो छ । स्वदेशमा नै अवसर खोज्नुपर्छ । नयाँ उद्यमी, व्यवसाय गर्नेलाई यो इभेन्टले मद्दत पुर्याउने छ । सुदूरपश्चिम सरकारले पनि यो प्रदेशमा लगानी गर्ने वातावरण बनायो भने थुप्रै उद्योगीको यस क्षेत्रमा उद्योग स्थापना गर्न मद्दत पुग्नेछ, यही सन्देश हामीले दिन खोजेको हो ।