धनगढी- कैलाली उद्योग वाणिज्य संघको आयोजनामा हुने सुदूरपश्चिम महोत्सवको तयारी पूरा भएको छ । मंसिर २२ गतेबाट पौष २ गतेसम्म हुने महोत्सवको तयारी पूरा भएको कैलाली उद्योग वाणिज्य संघले जनाएको छ ।
संघले बिहीबार पत्रकार सम्मेलन गर्दै महोत्सव तयारीको बारेमा जानकारी दिएको हो । महोत्सवको उद्घाटन प्रधानमन्त्री पुष्पकमल दाहाल ‘प्रचण्ड’ले गर्ने आयोजकले जनाएको छ । महोत्सव शुक्रवार मध्यान्ह साढे बाह्र बजे उद्घाटन गर्ने कार्यक्रम रहेको जनाइएको छ ।
महोत्सव स्थलमा सुदूरपश्चिमका परिकारसहितका खानाका स्टल रहने व्यवस्था गरिएको कैलाली उद्योग वाणिज्य संघका अध्यक्ष पुष्पराज कुँवरले जानकारी दिए । उनले महोत्सव अनुमानित ३ करोडको लगानीमा सम्पन्न गरिने तथा महोत्सवमा उद्योगी व्यवसायको १० करोड बराबरको कारोबार हुने अनुमान गरिएका बताए ।
त्यस्तै सुदूरपश्चिम महोत्सव २०८० मा कृषि, जडीबुटी, हस्तकला फर्निचर, अटोमोबाइल्स, गार्मेन्ट, इलेक्टोनिकल, होटल र सूचना प्रविधि गरी ४ सय जति संख्याको स्टलहरूको सहभागिता रहेको उनले बताए ।
महोत्सवमा करिब ६ लाख ५० हजार व्यक्तिले अवलोकन गर्ने अनुमान गरिएको आयोजकले जनाएको छ । महोत्सवमा चौधरी र राना
समुदायहरूको संस्कृति जर्गेनाको लागि संग्रालयसहितको अलग गाउँ नै निर्माण गरिएको जनाइएको छ । महोत्सव अवलोकनको लागि विद्यार्थीलाई रु.५०,सर्वसाधारणलाई रु. १ सय टिकट दर र फरक क्षमता भएकालाई निःशुल्क गरिएको जनाइएको छ । उद्घाटनमा प्रधानमन्त्रीलाई १० बुँदे माग सहित १० किलोको माला लगाइने आयोजकले जनाएको छ ।
