कैलालीको बर्दगोरिया गाउँपालिकाले छोटो समयमा स्वास्थ्य, शिक्षा, रोजगारमा अब्बल काम गर्दै आइरहेको छ । जनप्रतिनिधिले खाने पानीबाट वञ्चित नागरिकलाई शुद्ध खानेपानीको व्यवस्था लगायतका थुप्रै काम गर्न सफल भएका छन् । पछिल्लो समयमा नमुना गाउँपालिका बनाउने लक्ष्यका साथ अघि बढेका गाउँपालिका अध्यक्ष कर्णबहादुर कुँवरसँग निशाना न्युजले गरेको कुराकानी प्रस्तुत गरेका छौँ ।

गाउँपालिकामा तपाईँ निर्वाचित भएर आइसकेपछि के–कस्ता काम भएका छन ?
म निर्वाचित भएर आइसकेपछि यस गाउँपालिकाका नागरिक ५ वर्षदेखि शुद्ध खानेपानी पाउन बाट वञ्चित थिए । म र हाम्रो टिमले शुद्ध खानेपानीको व्यवस्था छोटो समयमा गरेका छौँ । अहिले यहाँका नागरिकले शुद्ध खानेपानी खान पाइरहेका छन् । झोलुङ्गे पुल निर्माण गरेका छौँ,सेती लोक मार्गका सडक पुल पुलेसा,कल्भड निर्माण,पालिकाका सडक पानी पिच गरेका छौँ । जसले गर्दा नागरिकलाई हिँडडुल गर्न सहज भएको छ । क्याम्पस थिएन, हामीले मुख्यमन्त्रीबाट हालै क्याम्पसको शिलान्यास पनि गराइ सकेका छौँ । पढाइ सुरु भएको छ । स्वास्थ्य सेवा दिने उद्देश्यले अस्पताल निर्माण गरेका छौँ । ९८ प्रकृतिका औषधीहरू निःशुल्क राज्यले व्यहोर्दै आएको छ,भने बाँकी औषधी अस्पतालकै फार्मेसीमा व्यवस्था गरेका छौँ । जसले गर्दा यहाँका नागरिकले निःशुल्क स्वास्थ्य सेवा पाइरहेका छन् ।

गाउँपालिकाले दिने सेवा कस्तो रहँदै आएको छ ?
गाउँपालिकाले नागरिकलाई दिने सेवा सहज र सरलका लागि कर्मचारीलाई निर्देशन दिएको छु । सेवा प्रभावकारी भएन भने हामीले नागरिकको गुनासो गर्ने व्यवस्था गरेका छौँ । अहिलेसम्म कर्मचारीले राम्रै सेवा दिँदै आइरहनु भएको छ ।

घर नक्सा पास गर्दा सडकको मापदण्ड कस्तो छ ?
२० फुटको सडक अनिवार्य हुनु पर्ने मापदण्ड बनाएका छौँ , सो मापदण्ड पुरा नगरी घर नक्सा पास गर्ने गरेका छैनौँ ।

अन्तमा थप नयाँ योजना छन ?
यो वर्षबाट यस पालिका भित्रका सबै सडक पानी पिच गर्ने योजना छ । भने आउँदो वर्ष पूरै सडक पिच गर्ने योजना छ । सीपमूलक कामलाई अघि बढाउने र गाउँपालिकाका बेरोजगार नागरिकलाई आत्मनिर्भर बनाउने योजना छ । बेरोजगारलाई अन्त गर्दै छिटो समयमा नमुना पालिका बनाउने योजना रहेको छ ।