नेकपा (माओवादी केन्द्र)ले सञ्चालन गरेको ‘घरघरमा माओवादी जनजनमा माओवादी’,‘जनतासँग माओवादी रुपान्तरण अभियान’ देशभर चलेकोे छ । गत भाद्र १६ गतेबाट सञ्चालित अभियानमा माओवादी नेता कार्यकर्ता गाउँगाउँमा पुगेर संगठन व्यवस्थित बनाउने,सदस्यता नवीकरण गर्ने,जनतासँगको भेटघाटलाई तीब्रता दिनेलगायतका काम गरिरहेका छन् । सुदूरपश्चिममा पनि यो अभियानले माओवादी क्रियाशीलतालाई बढाएको छ । रुपान्तरण अभियान कसरी अगाडि बढ्यो ? के–के उपलब्धि भए ? जनतामा कस्तो जागरण ल्यायो ? लगायतका बिषयमा नेकपा माओवादी केन्द्रका स्थायी समिति सदस्य तथा सुदूरपश्चिम प्रदेशका कार्यबाहक इन्चार्ज खगराज भट्टसँग निशाना न्युजले गरेको कुराकानीको सारसंक्षेप………………।

माओवादीको तीन महिने रुपान्तरण अभियान कसरी अगाडि बढ्यो ?

रुपान्तरण अभियान संगठनात्मक सुदृढिकरण,संस्थात्मक रुपान्तरण र जनसम्बन्ध सुदृढ गर्ने दृष्टिकोणले ऐतिहासिक र युगान्तकारी बन्न पुगेको छ । यसले पार्टी जीवन भित्रका समस्यालाई पिँधसम्म पुगेर गहिरोसँग अध्ययन अनुसन्धान गर्ने कार्यकर्ताका गुनासा,जिज्ञासालाई सुन्ने,जनतासँग पार्टी र सरकारप्रतिको जनताको संवेदशीलताका गुनासाहरुलाई केन्द्रीत गर्ने,पार्टीलाई चुस्त र व्यवस्थित बनाउने,चालयमान र गतिशील शक्तिको रुपमा विकास गर्दै भविष्यको नेतृत्वदायी,राष्ट्रको क्रान्तिकारी र वैज्ञानिक नेतृत्व गर्ने शक्तिमा पार्टीलाई बनाउनको लागि ऐतिहासिकरुपले सफल छ ।

अभियानबाट के–के उपलब्धि भए ?

संगठनहरु व्यवस्थित भएका छन् । सदस्यता नवीकरण राम्रोसँग अगाडि बढेको छ । कार्यकर्ताहरुमा उत्साह पैदा भएको छ । पार्टी जीवित छ,पार्टी रहेछ,पार्टीप्रति भरोशा पैदा भएका थुपै कुरा आएका छन् । हामीले त माओवादी हरायो,विलायो भन्थ्यौँ, तर ज्युँदै रहेछ । जनतालाई सम्झिने रहेछ । सबै जुनाव जितेर सरकारमा गएपछि जनता बिर्सिन्छन् । माओवादी सरकारमा हुँदा जनतामा आयो, घरदैलोमा आयो,भनेर जनताले,शहिद परिवार,घाइते,बेपत्ता,अपांग परिवारले यो अभियानलाई उत्साहपूर्वक र सम्मान पूर्वक लिएका छन् । यसबाट उर्जा पैदा भएको छ ।

अभियानले जनतामा कस्तो जागरण ल्याएको छ ?

हाम्रो पहिलो चरणमा संगठनात्मक बिषयमै मूलभूतरुपमा केन्द्रीत भयो । दसैँ तिहारको कारण पनि अभियानमा केही समस्या पैदा भए । चाँडपर्व,खेतीपातीको सिजनले पनि भयो । तर माओवादीलाई जनाताँग जोड्न र जनतालाई माओवादी प्रति विश्वस्त तुल्याउने कुरामा भने यो अभियान हामीले सोचेकै स्तरमा सफल भएको छ ।

माओवादी नेतृत्वको सरकारले थुपै राम्रा काम गरेको भन्ने चर्चा हुन्छ,सरकारले गरेका काम तपाईहरुले जनतासम्म पु¥याउन नसक्नु भएकोे हो ?

हाम्रो पार्टीलाई अलिकति आधुनिक बनाउन जरुरी छ । खासगरी सामाजिक सञ्जाल प्रयोग गर्ने कुरा,सूचना प्रविधिमा अलि बढी पहुँच र पक्कड बनाउने कुरामा हाम्रो पार्टी कमजोर छ । विस्तारै हामी सिक्दै छौँ । हाम्रो पार्टीका सबै साथीहरुले त्यो सरकारले गरेको कामप्रति स्वामित्व लिन नचाहेर होइन् । हामी अलिकति आधुनिक प्रविधिसँग जोडिने कुरामा केही समस्या छन् । जसले गर्दा यो समस्या आएको हो ।

माओवादी पार्टी कमजोर हुँदै गएको भन्ने पनि सुनिन्छ,०८४ को निर्वाचनमा त झन कमजोर हुन्छ भन्छन नि ?

त्यो भनाइका लागि केही तथ्य पनि छन् । माओवादी गठबन्धन हुँदा पनि १८ सिटमा पुग्यो । हिजो माओवादीले संगठनलाई उपेक्षा गरेको हो । संगठन व्यवस्थित नभएको,जनसम्बन्ध कमजोर भएको परिस्थितमा यो परिणाम आएको थियो । यो अभियानले पार्टीलाई उर्जा दिएको छ । थुपै सपना देखाएको छ । हामीलाई विश्वास के छ भने यसपालीको र यो भन्दा अघिल्लो निर्वाचनको रिजल्टको साँवा र व्याज असुल्ने गरी २०८४ सालको निर्वाचनमा माओवादी पहिलो शक्तिको रुपमा उदाउँछ । यो अभियानले हामीलाई त्यो एउटा गहिरो विश्वास पैदा गरेको छ ।