कैलाली- नवजीवन अस्पतालले आफ्नो १८आँै बार्षिकोत्सव अवसरमा विभिन्न कार्यक्रम गरी मनाएको छ । आज अस्पतालको प्राङ्गणमा रक्तदानका साथै बिरामीलाई फलफूल वितरण गरी आफ्नो १८ औँ बार्षिक उत्सब मनाएको हो ।
सोही अवसरमा अस्पतालले बर्षभरी गरेका सेवाको बारेमा पनि जानकारी दिएको छ । अस्पतालका प्रबन्ध निर्देशक चक्र कडायतले आर्थिक बर्ष २०७९ देखि २०८० माघसम्ममा इमरजेन्सी सेवा पाएका बिरामी संख्या ४ हजार नौ सय ५४ रहेको बताए । उनका अनुसार बहिरंग सेवा पाएका जम्मा बिरामी संख्या ३० हजार तिन सय ४६ जना रहेको र अन्तरंग सेवा पाएका बिरामी संख्या ४ हजार पाँच सय १३ रहेका छन् ।
शल्यक्रिया (मेजर, ईन्टरमिडियट माईनर) २ हजार एक सय ३०, निःशुल्क सुत्केरी सेवा पाएका १ हजार ४ सय ६३, निःशुल्क खोप सेवा लिएका बालबालिकाको संख्या दुई हजार ८ सय ९४ रहेको उनले बताए । जेष्ठ नागरिक,अति विपन्न,गरिबले सेवा लिएको संख्या ५ सय ७५ र अस्पताल भित्र तथा विभिन्न स्थानमा सञ्चालित शिविर मार्फत सेवा लिएका बिरामीको संख्या ५ हजार ७ सय ६२ रहेको उनको भनाइ छ ।
नवजीवन अस्पतालले डाईलासिस सेवा दिँदै
नवजीवन अस्पतालले ६ वटा डाईलासिस मेसिनबाट बिरामीलाई सेवा दिदै आएको छ । २०७९ श्रावण १५ गतेबाट अस्पतालले ६ मेसिनबाट सो सेवा दिदै आएको हो । शुरुवाती डाइलासिसका लागि ६ हजार ५ सय,नियमितका लागि ४ हजार ५ सय र आईसियुमा राखेर उपचार गर्ने बिरामीका लागि १० हजार शुल्क निर्धारण गरेको डाइलासिस युनिट इन्चार्ज अञ्जना तन्डुकार श्रेष्ठले जानकारी दिइन ।
विपन्न नागरिकका लागि भने स्थानिय तहको सिफारिसको आधारमा निःशुल्क हेमो डाइलासिस सेवा पनि शुरुवात भएको उनले बताइन । मार्क इन्टरनेशनल किड्नी सेन्टर काठमाडौ संगको सहकार्यमा अस्पतालले डाइलासिस सेवा सुरु गरेको जनाइएको छ ।
