कञ्चनपुरको बेलौरी नगरपालिकामा सडक,शिक्षा,खानेपानी,कृषिलगायतका क्षेत्रमा देखिने गरि काम भइरहेका छन् । नगरको समग्र विकासका विषयमा अघिल्लो ५ वर्षे कार्यकालमा नगरको नेतृत्व गरि लोकप्रिय काम गरेर दोस्रो कार्यकाल नेतृत्व सम्हालेका नगरप्रमुख पोतिलाल चौधरीको विचार प्रस्तुत गरेका छौँ ।
बेलौरी नगरपालिकाले करिब यो दुई वर्षको अवधिमा धेरै कामहरु गरेको छ । बेलौरीले परिकल्पना गरेको रिङरोड करिब ५ किलोमिटर कालोपत्रे सम्पन्न हुँदैछ । बेलौरी बजार क्षेत्रमा ९ किलोमिटर डिलिङ निर्माण कार्य हुँदैछ । १ करोड २० लाखमा कृषि भवन बनाउने काम सुरु भएको छ । २ वटा वडा कार्यालय भवनहरु उद्घाटन भएका छन् । प्रत्येक वडामा पशु र कृषि शाखा स्थापना गर्ने निर्णय भएको छ । केही हप्तामै वडामा जानेछन् । नगरले मावि स्तरसम्मका लगभग सबै विद्यालयमा आइसिटी पुस्तकालय दिइसकेको छ ।
भवन अपुग भएका ठाउँमा विद्यालय भवन लगभग निर्माण भइसकेका छन् । बेलौरी नपाका १० वटै वडामा खानेपानी योजना परेका छन् । वडा नं.२,५,७ र ८ मा खानेपानी सञ्चालनमा रहेको छ । वडा नं. १ र १० मा निर्माणका कामहरु हुँदैछन् । अबको ९÷१० महिनामा त्यहाँका नागरिकले खानेपानी पाउनेछन् । अरु वडामा बजेट परेको छ, कम छ । बजेट अभावले खानेपानी निर्माण कार्य रोकिएको छ ।
वडा नं. ३ मा लागत स्टिमेट तयार भएको छ । मन्त्रालयबाट बजेट स्विकृत गराउनु पर्नेछ । खानेपानीको क्षेत्रमा लगभग सबै वडामा बजेट परेको छ । प्रत्येक वडामा स्वास्थ्य केन्द्र स्थापना भइसकेको छ । कतिपय वडामा स्तरोन्नति गरेर वर्थिङ सेन्टर सञ्चालन गर्ने कुरामा गइरहेका छौँ । बजेट अभावले त्यो कुरा रोकिएको छ । १ जना विशेषज्ञबाट सेवा दिइरहेका छौँ । बेलौरी प्राथमिक स्वास्थ्य केन्द्रमा १५ शय्याको अस्पताल निर्माण भइरहेको छ । त्यो निर्माण भइसकेपछि आइसीयु बेडसहित स्थापना गर्ने,डाक्टर राख्ने तयारीमा हामी छौँ ।
नगरपालिकाले कृषि समूह गठन गरेर समूहमार्फत सोझै कृषि शाखाबाट किसानलाई जोड्ने काम भएको छ । सबै वडामा कृषि समूह सञ्जाल गठन गरिएको छ । नगरमा कृषि समूह गठन भएको छ । कृषि अनुदानमा किसानलाई च्याउ,आलुलगायतको बीउ ५० प्रतिशत अनुदानमा दिएका छौँ । नगरपालिका र सहकारीको सहकार्यमा यो वर्ष शुद्ध तोरीको तेल उत्पादन उद्योग सञ्चालनमा आएको छ । किसानलाई तोरी उत्पादनमा प्रोत्साहित गर्न पालिकाले सहयोग गर्ने,शुद्ध तेल उत्पादन गरेर विक्री वितरण गर्ने भनेर उद्योग सञ्चालनमा आएको छ । यसरी पालिका किसानका समस्या समाधानका लागि समूह सहकारीमार्फत अगाडि बढेको छ ।
