धनगढी- यौन तथा प्रजनन् शिक्षाको कमीले गर्दा मातृ मृत्युदर बढेको सरोकारवालाहरुले बताएका छन् । युवा गठबन्धन विकासले मंगलबार धनगढीमा आयोजना गरेको बृहत यौनिकता शिक्षा र यौन तथा प्रजनन् स्वास्थ्य सम्बन्धी सरोकारवालाहरुबीचको छलफल कार्यक्रममा सहभागीहरुले यस्तो बताएका हुन् । मातृ मृत्युदर घटाउन सानै उमेरमा बिहे गर्ने कार्यलाई रोक्नुपर्ने सहभागीको जोड थियो ।
कार्यक्रममा बोल्दै चक्रबहादुर बमले छोरा छोरीलाई यौन तथा प्रजनन् सम्बन्धी जनचेतना फैलाउन आवश्यक रहेको बताए । उनले अझै पनि समाजमा सानै उमेरमा विवाह गर्दा मृत्युदर बढ्न गएको बताए । जबसम्म समाजमा गएर बालविवाह सम्बन्धी जनचेतना फैलाउन सक्दैनौं तबसम्म मृत्युदरमा कमी नआउने उनले बताए ।
छाउपडी प्रथाले गर्दा पनि यौन तथा प्रजनन् स्वास्थ्यमा सुधार नआएको सुन्दरराज शर्भाले बताए । उनले किशोरी रजोस्वला हुँदा घर भन्दा टाढा राख्दा पनि मृत्युदर बढ्दै गइरहेको बताए । समाजमा रुढीबादी सोचले गर्दा अझै मृत्युदरमा कमी आउन नसकिरहेको उनको भनाइ छ ।
कार्यक्रममा फाया नेपालका प्रोगाम संयोजक लालबहादुर महराले यौन तथा प्रजनन् सम्बन्धी प्रस्तुतीकरण गरेका थिए ।
