कैलाली- युवा संगठन नेपालको पाँचौँ राष्ट्रिय सम्मेलन आयोजक समिति संयोजक पाटन जंगली सीले नेपाली विशेषताको वैज्ञानिक समाजवादले मात्र देशको अर्थतन्त्र बलियो हुने बताएका छन ।

यही चैत २४ गते धनगढीमा हुने नेत्रविक्रम चन्द (विप्लव) नेतृत्वको नेपाल कम्युनिष्ट पार्टी निकट युवा संगठन नेपालको पाँचौ राष्ट्रिय सम्मेलनको तयारीका बिषयमा आयोजना गरेको पत्रकार सम्मेलनमा उनले सो कुरा बताएका हुन् ।

उनले संसदीय व्यवस्थाले पँुजिपती वर्गको पक्षपोषण गर्दै जाने र देश कंगालमा परिणत हुने बताए । नेपालको यो अवस्था हुनु अहिलेको संसदीय व्यवस्थाको परिणाम भएको उनले बताए । नेपालमा उत्पादन नहुनु र युवा विदेश गएर पसिनाको कमाईको रेमिट्यान्सले देश चलिरहेको उनको धारणा छ ।

पूर्वाग्रही राजनीति रेडिमेट जडसुत्रवादी नेताका कारण देशको अवस्था नाजुक बन्दै गएको उनले बताए । अब सबै मिलेर राज्य जोगाउनु पर्ने बेला आएको बताउदै उनले भने सबै युवा मिलेर देश विकासको बहस चलाउन आवश्यक भइसकेको छ ।
राजाले २०५८ सालमा मारिसकेको व्यवस्थालाई पुनः २०६२।६३ को जनआन्दोलन बाट बिउझाएको बताउदै उनले यो संसदीय व्यवस्था जनताको नभइ पुँजिपति वर्गको भएको बताए । युवाले पार्टीका दास बन्न नहुने र देश विकासमा हातेमालो गर्दै अघि बढ्ने समय आएको उनले बताए ।

युवा संगठन नेपालको पाँचौँ राष्ट्रिय सम्मेलन धनगढीमा हुने

युवा संगठन नेपालको पाँचौ राष्टिय सम्मेलन धनगढीको खुल्ला मञ्चमा हुने भएको छ । आज धनगढीमा गरेको पत्रकारसँगको भेटघाटमा सम्मेलनको तयारी पूरा भएको जनाएको छ । चैत्र २४ गते हुन लागेको सम्मेलनको उद्घाटन नेपाल कम्युनिष्ट पार्टीका महासचिव विप्लव सीले गर्ने संगठनले जानकारी दिएको छ । सम्मेलनको उदेश्य जनताको न्यायपूर्ण विकासका बारेमा र राष्ट्रवादी बामपंन्थी,सम्पूर्ण कम्युनिष्ट, युवाको बारेमा चासो चिन्ता राख्ने हरेक नागरिकसँग बहस गर्ने रहेको छ ।

यसमा हरेक संघ संगठन फराकिलो भएर बहसमा आउन पनि भनेको छ । संसदवादी राजनितिक पार्टी भित्रका हरेक नेता कार्यकर्ताहरुको उदेश्य स्थानीयदेखि केन्द्रीय सत्तामा पुग्ने र सम्पती कुम्ल्याउने मात्र रहेको बताइएको छ ।