धनगढी- जिल्ला क्रिकेट संघ कैलालीले जिल्लाको ग्रास रुट क्रिकेट मजबुत बनाउन एक हप्ताका लागि भारतको मुम्बईबाट प्रशिक्षक बोलाएको छ । मुम्बईको विभिन्न क्लबमा नियमित प्रशिक्षण गराउँदै आएका दिगम्बर सिताराम पार्डेललाई क्यानले धनगढी बोलाएको हो । दिगम्बर एक हप्ता धनगढीमा रहने नेपाल क्रिकेट संघ क्यानका केन्द्रीय सदस्य एवं कैलाली जिल्ला अध्यक्ष विक्रम बिस्टले बताए ।
मंगलबार धनगढी रङ्गशालामा एक कार्यक्रम गरी नेपाल क्रिकेट संघ क्यानका केन्द्रीय सदस्य एवं कैलाली जिल्ला अध्यक्ष विक्रम बिस्ट,क्यान कैलाली सचिव देव नारायण झा,प्रशिक्षक जानकी भट्ट,दीपक रावल लगायत खेलाडीले प्रशिक्षक दिगम्बरलाई औपचारिक रूपमा स्वागत समेत गरेको छ । राष्ट्रिय क्रिकेट टिमको सुरुवाती १४ भित्र पहिलो पटक अटाएका खेलाडी अर्जुन साउँदलाई पनि प्रशिक्षक दिगम्बरले लामो समय मुम्बईमा प्रशिक्षण गराएका थिए ।
स्वागतपछि प्रशिक्षक दिगम्बरले आफू जति दिन धनगढी बस्छु पुरा समय दिएर जानेको कुरा सिकाउने बताए । उनले विश्व क्रिकेटको महाशक्ति भारत नजिक भएपनी त्यसको फाइदा नेपालले लिन नसकेको बताए । कूटनीतिक तवरले भएपनी नेपालले आगामी दिनमा भारतका विभिन्न स्टेटसँग सहकार्य गरेर फाइदा लिनुपर्नेमा जोड दिँदै आफूले पनि मुम्बईबाट सक्दो सहयोग गर्ने दिगम्बर बताउँछन् ।
जिल्ला क्रिकेट संघ कैलालीले दुई महिना अगाडि धनगढी उपमहानगरपालिका भित्रका करिब दर्जन बढी विद्यालयहरूसँग सहकार्य गरेर ५० छात्र र ५० जना छात्रालाई पहिलो चरणमा प्रशिक्षण गराइरहेको छ । नेपाल क्रिकेट संघ क्यानका केन्द्रीय सदस्य एवं कैलाली जिल्ला अध्यक्ष विक्रम बिस्ट भन्छन् यो सुरुवात मात्र हो यसपछि कैलालीका थप क्षेत्रहरू ,अत्तरिया,हाइवे,लम्की क्षेत्र र टिकापुरमा पनि दोस्रो चरणको ग्रास रुट डिप्लोमेन्ट प्रोग्राम सुरु हुने बताए ।
हाल देशभरमा कैलालीमा मात्र ग्रास रुट डिप्लोमेन्ट प्रोग्राम चलिरहेकोले अब विभिन्न जिल्लामा पनि छिट्टै सञ्चालन हुने बिस्ट बताउँछन् । हाल धनगढी रङ्गशालाको इनडोर हलमा नियमित प्रशिक्षणमा आउने एक समय जना छात्र छात्रालाई दुई सिफ्ट बनाएर प्रशिक्षक ज्ञानेन्द्र दडीमाना क्षेत्री र जानकी भट्टले प्रशिक्षण गराउँदै आएका छन् ।
