सुदूरपश्चिम प्रदेशको बझाङ प्रदेश सभा १ मा यही बैशाख १५ मा उप निर्वाचन हुँदैछ । यहाँ राजनीतिक दलहरुले चुनावी प्रचारप्रसारलाई तीब्र बनाएको छ । जनताको मन जित्न उम्मेदवारहरु घरदैलो अभियानमा छन् । प्रमुख राजनैतिक दलका सहित ११ जना उम्मेदवार चुनावी प्रतिष्पर्धामा छन् । नेकपा माओवादी केन्द्रबाट जनकबहादुर बुढा उम्मेदवार रहेका छन् । यस क्षेत्रमा माओवादी केन्द्रको प्रचारप्रसारको अभियान,पार्टीको सांगठनिक अवस्थालगायत बिषयमा नेकपा माओवादी केन्द्रका बझाङ जिल्ला संयोजक टोपबहादुर खड्कासँग निशाना न्युजले गरेको कुराकानी प्रस्तुत गरेका छौँ ।

निर्वाचन केन्द्रीत प्रचारप्रसारलाई कसरी अगाडि बढाइराख्नु भएको छ ?

प्रचारप्रसारका लागि निर्वाचन क्षेत्रभित्रका सबै पालिकामा केन्द्रीय सदस्यको नेतृत्वमा प्रचार प्रसार टोली खटिएको छ । सुर्मा गाउँपालिकाको वडा नं. १ देखि ५ सम्म जनतासँग भेटघाट गरिसकेका छौँ । जयपृथ्वी नगरपालिकाका अधिकांश वडामा भेटघाट सम्पन्न गरेका छौँ । तलकोट र मष्टा गाउँपालिकामा जनतासँग भेटघाट गरेका छौँ । केही दिनभित्र यहाँका सबै पालिकामा भेटघाट सम्पन्न गर्ने लक्ष्यका साथ चुनावी प्रचारप्रसार तीब्र गतिमा अगाडि बढाएका छौँ ।

जनताको प्रतिक्रिया कस्तो पाउनुभएको छ ?

गठबन्धनले गर्दा माओवादी केन्द्रको चुनाव चिन्हमा मतदाताले भोट हाल्न नपाएको १० वर्ष भयो । यसपटक हामीले हाम्रो चुनाव चिन्ह र उम्मेदवार पाएका छौँ । हामीले मतदाता उत्साहित भएको महसुस गरेका छौँ । साथै स्थापित युवा नेता,संविधानसभा सदस्य र विकास प्रेमी भएकाले हाम्रो उम्मेदवार जनतामाँझ लोकप्रिय नै रहेको जनताको प्रतिक्रिया छ ।

तपाईका पार्टीका उम्मेदवारलाई जनताले जिताउँछन् त ?

हाम्रो पार्टीले विगत लामो समय केन्द्रदेखि स्थानीय तहसम्म जनमुखि,विकास निर्माण,जनताका जीवन निर्वाहका कुराहरुमा काम गर्दै आएको छ । हाम्रो पार्टीले जितेका स्थानीय तहमा पनि उत्कृष्ट काम भएका छन् । बझाङकै कुरा गर्ने हो भने हाम्रो पार्टीले जितेको छबिसपाथीभरा गाउँपालिका स्वमुल्यांकनमा जिल्लामै उत्कृष्ट भएको छ । राम्रो काम गरेको भएर त होला नि उत्कृष्ट भएको । हाम्रो पार्टीबाट जितेका जनप्रतिनिधिले सबैठाउँमा उत्कृष्ट काम गर्ने हुँदा जनताले हाम्रो उम्मेदवारलाई जिताउनु हुन्छ ।

बझाङमा तपाईको पार्टीको सांगठनिक अवस्था कस्तो छ ?

यहाँका सबै पालिकामा संगठन मजबुद छ । हामी सांगठनिकरुपमा एकरुपतामा छौँ । पार्टीको जिल्लामा आफ्नै कार्यालय पनि छ । पार्टी व्यवस्थित पनि छ । यसपटकको निर्वाचनमा सबै नेता,कार्यकर्ता एकजुट भएर प्रचाप्रसारमा लागेका छौँ । हामी एकजुट छौँ ।