सुदूरपश्चिम प्रदेशको बझाङ प्रदेश सभा १ मा यही बैशाख १५ मा उप निर्वाचन हुँदैछ । यहाँ राजनीतिक दलहरुले चुनावी प्रचारप्रसारलाई तीब्र बनाएको छ । जनताको मन जित्न उम्मेदवारहरु घरदैलो अभियानमा छन् । प्रमुख राजनितिक दलका सहित ११ जना उम्मेदवार चुनावी प्रतिष्पर्धामा छन् । नेकपा माओवादी केन्द्रको तर्फबाट भने जनकबहादुर बुढा उम्मेदवार रहेका छन् । यस क्षेत्रको चुनावी अभियान, अवस्था, एजेन्डाका बिषयमा प्रदेश सभा सदस्यका उम्मेदवार उनै जनकबहादुर बुढासँग निशाना न्युजले गरेको कुराकानी प्रस्तुत गरेका छौँ ।
तपाई उम्मेदवार हुनुन्छ,चुनावी गतिविधि कसरी अगाडि बढाउनुभएको छ ?
हाम्रो पाटीको गत चैत २७ गतेको बैठकपछि २८ गतेदेखि निर्वाचन क्षेत्रका सातवटै पालिकामा हाम्रो टोली परिचालित छ । निर्वाचन केन्दीत भएर जनस्तरसम्मै साथीहरु पुगि राख्नुभएको छ । आजका दिनसम्म तलकोट,मष्टा,सुर्मा गाउँपालिका र जयपृथ्वी नगरपालिकामा भेटघाट अभियान गरेका छौँ । भोलि टोली खप्तडछान्ना गाउँपालिका प्रवेश गर्छ । यी चारवटा पालिकाको अभियानबाट हामी र हाम्रो टिम विशेषत त्यहाँका साथीहरु उत्साहित हुनुभएको छ । अपेक्षा गरेको भन्दा पनि राम्रो जन समर्थन देखिन्छ । यो जिल्लामा मैले विभिन्न क्षेत्रमा जनतासँग सहकार्य गरेको साथ दिएको कारणले गर्दा यसपटक मैले र माओवादीले जित्नुपर्छ भन्ने जनताको मनोविज्ञान छ ।
कांग्रेस र एमालेलाई त हेरि सक्यौँ । अहिलेसम्म पटक पटक भोट हाल्यौँ । उनीहरुले काम गर्न सकेनन् । अव माओवादीले नेतृत्व गर्नु पर्छ भन्ने जनस्तरमा देखिन्छ ।
जनताका आशा,अपेक्षा,गुनासा र प्रतिक्रिया कस्तो पाउनुभयो ?
जनताका आशा,अपेक्षा हुन स्वाविक हो । चासो चिन्ता सबै ठाउँमा देखिए । खासगरी धेरै ठाउँहरुमा स्थानीय सरकारको सीमा समस्याका कुराहरु पनि जनताले टिकाटिप्पणी गरेको पायौँ । खासगरी माओवादी पार्टी हिजोको दिनमा जसरी जनयुद्ध लड्दै गर्दा जनताको घरदैलोमा जाने,जनताको सुख दुखमा साथ दिने प्रकारको कडिलाई हामीले निरन्तरता दिन नसक्दा केही भ्रमहरु रहेको हामीले पायौँ । समग्रतामा अधिकांश जनताको यस क्षेत्रमा एकपटक माओवादीलाई हेर्नुपर्छ भन्ने नै छ ।
तपाईका चुनावी एजेन्डा के के छन् ?
मैले धेरै कुरा राखेको छैन् । खासगरी यहाँको सडक पूर्वाधार,चैनपुर ताक्लाकोट सडक,खुटिया—दिपायल—चैनपुर सडक,सबै पालिकामा कालोपत्र सडक पुर्याउने कुरा मेरो प्राथमिकतामा छ । यो जिल्ला भूकम्प र बाढीबाट बढी पीडित र ग्रसित छ । यहाँ अहिले पनि थुप्रै घर,विद्यालय,स्वास्थ्य चौकी भत्किएका छन् । निर्माण हुन सकेका छैनन् । नदी कटानले ठूलो क्षति पर्याएको छ । यसको तटबन्धन गर्ने मेरो प्राथमितामा छ ।
पछिल्लो चरणमा रोजगारीका लागि पलायन हुने अवस्थामा जिल्लामै कसरी राजगारी सिर्जना गर्न सकिन्छ त्यसमा मेरो ध्यान जाने छ । त्यसका लागि सुर्मा,शैपाल,खप्तडलगायतका पर्यटकीय क्षेत्रमा पूर्वाधार निर्माण गरेर विश्वको ध्यान आकर्षित गर्न एउटा योजना बनाउने,यहाँको जडिबुटी निकास गरी व्यवसायिकरण गर्ने,लगानी भित्र्याउने सके केही मान्छे रोजगार बन्छन् । सेतीमा केही हाइड्रोपावर बनिरहेको छ । केही बन्ने प्रकृयामा छ । यसमा ठूलो संख्यामा रोजगारको निमित्त यसलाई केन्द्रीय सरकारलाई अलि चाडो घच्घच्याएर काम गर्न सक्छौँ । यहाँको कृषि क्षेत्रको विकास गर्ने,टेलिफोनको समस्या समाधान,शिक्षा स्वास्थ्यमा गुगात्मक सुधारलगायतका बिषय म र मेरो पार्टीको प्रमुख एजेन्डा रहेका छन् ।
जिल्लाको ग्याम चेन्जर प्रोजेक्टको रुपमा रहेको दिपायल—चैनपुर—ताक्लाकोटसम्मको सडक निर्माण चाडो गर्न सके चाइनासम्मको नाकालाई यस नाकाबाट खोल्न सक्यौँ भने यो मानसरोवरसम्म पुग्ने छोटो मार्ग पनि हो । भारतीय हिन्दु धर्मावलम्बीलाई यो मार्गबाट भित्र्याउन सके यहाँका जनता प्रत्यक्ष र अप्रत्यक्ष रोजगारी पाउने छन् । यसमा मेरो पहल रहने छ ।
तपाईको जित्ने आधार के छ ?
यो निर्वाचन क्षेत्रमा अहिलेसम्म कांग्रेस र एमालेले जितेको छ । उनीहरुले काम गर्न सकेका छैनन् । जनता वाक्कदिक्क छन् । जनता नयाँ पात्र र नयाँ पार्टीको खोजीमा छन् । म विगत लामो समयदेखि यहाँका जनताको सुखदुखमा जोडिदै आएको छु । हरेक इस्युमा साथ दिदै आएको छु । मैले जनताको सेवाबाहेक केही काम गरेको छैन् । संविधान निर्माण देखि अहिलेसम्म मैले यो व्यवस्था परिवर्तनको निमित्त जे जति योगदान गर्न सके यसमा बझाङका जनता स्पष्ट छन् । त्यसकारण यहाँका जनताले यसपटक हाम्रो पार्टी र हाम्रो पार्टीको उम्मेदवारको पक्षमा जनमत सिर्जना गर्छन् भन्ने मेरो पूर्ण विश्वास छ ।
अन्त्यमा तपाईको भनाइ के छ ?
हाम्रो पार्टी यतिबेला चुनावी मैदानमा छ । हामीले व्यवस्था परिवर्तनका लागि लामो लडाइ लड्यौँ । जनताको अवस्था सुधार र यो व्यवस्थाको रक्षाका निमित्त यो व्यवस्था ल्याउने पार्टी चुनावी मैदानमा छ । हामीलाई विजयी गराउन सक्नुभयो भने यो व्यवस्थाको रक्षा,यहाँको विकास निर्माण र जनजीविकाको सवालमा खरोरुपमा उत्रने छु भन्न चाहान्छु ।
