डडेल्धुरा- डडेल्धुरा सदरमुकामसँगै जोडिएको ऋषि सामुदायिक वनमा लागेको डढेलो अझै नियन्त्रणमा आउन सकेको छैन । दुई दिनदेखि सामुदायिक बनमा लागेको आगो नियन्त्रणमा आउन नसकेपछि डडेल्धुरा सदरमुकाम बजार त्रसित बनेको छ ।
डढेलो डडेल्धुरा क्याम्पस नजिक पुग्न लागेकाले अहिले दमकल प्रयोग गरि नियन्त्रणमा ल्याइएको र अन्यत्र फैलिएको आगो भने अझै नियन्त्रणमा आइ नसकेको स्थानीय तर्कराज भट्टले बताए ।
डढेलो नियन्त्रणमा सुरक्षा निकाय र दमकल बिहानै देखि परिचालन गरिएको छ तर नियन्त्रणमा आउन नसकेको जिल्ला प्रहरी कार्यालय डडेल्धुराका प्रवक्ता एवम् प्रहरी निरीक्षक कुसुम नायकले जानकारी दिए ।
यसैगरी डडेल्धुराका अधिकांश सल्लेरी वनहरूमा आगलागी भएपछि सुरक्षा निकायको ठुलै फौज नियन्त्रणमा जुटिराखेको भए पनि अहिलेसम्म आगो नियन्त्रणमा आउन नसकेको अमरगढी नगरपालिकाका नगर प्रमुख डिल्लीराज जोशीले जानकारी दिए ।
आगलागी नियन्त्रणका लागि तीनै तहका सुरक्षा निकाय र अमरगढीका कर्मचारीहरू समेत आगो नियन्त्रणमा लागेका छन् छिट्टै नियन्त्रणमा आउने उहाँले बताए ।
