महालक्ष्मी विकास बैंकका देशैभर १०३ शाखा रहेका छन् । ती मध्ये सुदूपश्चिमभर १७ शाखा छन् । महालक्ष्मीका कैलालीमा मात्रै ७ वटा शाखा मार्फत सेवा प्रदान गर्दै आएको छ । २०५८ सालमा धनगढी शाखाको स्थापना भएको हो । बैंकको ऋण लगानी लगायतका याबत बिषयमा धनगढी शाखाका प्रबन्धक झंकर कडायतसँग निशाना न्युजले गरेको कुराकानी प्रस्तुत गरेका छौँ ।

महालक्ष्मी विकास बैँकको धनगढी शाखाको अवस्था के छ ?

यो शाखाको अवस्था ठिकै छ । बैँक तरलता बढेका कारण कर्जाको माग घटेको हुँदा लगानीमा समस्या छ । पछिल्लो समय लगानी छैन,  समस्या हुने नै भो ।

बैंकले कस्तो क्षेत्रमा ऋण लगानी गरेको छ ?

हामीले व्यापार, उद्योग, कृषि क्षेत्रलाई प्राथमिकतामा राखेर लगानी गरेका छांै । कृषि क्षेत्रमा भन्नु पर्दा बंगुरपालन, केराखेती भैंसीपालन, पाछापालन, फलफूलमा काम गर्ने कृषकलाई ऋण दिएका छौ । कृषि क्षेत्रमा मात्रै ८ करोड रुपैयाँ ऋण लगानी भएको छ । भारतबाट नेपाल भित्रिने फलफूलका कारण नेपाली कृषक मारमा पर्ने गरेका छन् । यहाँको कृषि क्षेत्रको बजार त्यति फस्टाउन सकेको छैन् । अर्को कुरा कोल्ड स्टोरको कमीका कारण बेमौसी फलफुल उत्पादनमा ह्रास आइरहेको छ । कृषकहरुले सोचे जस्तो आम्दानी गर्न सकेका छैनन् । यसका कारण सो क्षेत्रमा गरिएको लगानी उठ्न समस्या हुन्छ कि भन्ने छ । ब्यापारमा ५० करोड ऋण लगानी छ । अहिले आर्थिक मन्दीका कारण पनि ब्यापार व्यवसाय फस्टाउन सकेको छैन् । उद्योग क्षेत्रमा १० करोड ऋण लगानी छ ।

ऋण असुली संन्तोस जनक छ त ?

किस्ता अनुसार तिर्ने ब्यापारीको त्यती अप्ठेरो छैन् । ढिला भएपनि किस्ता अनुसार ऋण असुली हुने गरेको छ । किस्ता थोरै हुन्छ असुल भईरहेको छ । समस्या ठुला ऋणीको हो । धनगढी शाखामा असुलीमा सन्तोस जनक नै छ ।

अहिले कर्जाको माग कस्तो छ ?

पहिलाको भन्दा अहिले घटेको छ । आर्थिक मन्दीले सबै क्षेत्रमा त्यत्तीकै मार छ । बैंकमा हुने पोलिसीका कारण पनि समस्या छ । आबश्यक कागजजात मिलाउन सकेन भने कर्जा दिन सकिदैन ।

महालक्ष्मी बैँक घाटामा छ या नाफामा ?

वित्तीय संस्थामा प्रतिस्पर्धामै प्रिमियम दरमा कमी आएकाले पहिला जस्तो नाफा नभई कम नाफा हुने गरेको तर पनि धनगढी शाखा नाफामा नै रहेको छ ।

ब्यबसायी र बैंकको समबन्ध कस्तो छ ?

आर्थिक मन्दीका कारण व्यवसयमा परेको असरको कारण पहिलाको जस्तो सम्बन्ध नरहेपनि सन्तोष जनक छ ।