धनगढी- नेकपा (माओवादी केन्द्र)का अध्यक्ष एवं प्रधानमन्त्री पुष्पकमल दाहाल ‘प्रचण्ड’ले माओवादी सुदूरपश्चिम प्रदेश संसदीय दलको नेता परिवर्तन गर्न निर्देशन दिएका छन् । आज बालुवाटारमा प्रदेश सांसदसहित भएको छलफलमा तत्काल माओवादी केन्द्रबाट संसदीय दलको नेतामा खगराज भट्टलाई चयन गर्न सांसदहरुलाई निर्देशन दिएका हुन् ।
प्रधानमन्त्रीले दुई दिन भित्र निर्णय गरेर खगराज भट्टलाई दलको नेतामा चयन गर्न निर्देशन दिएको छलफलमा सहभागी माओवादी केन्द्रका सांसद रमेशसिंह धामीले निशाना न्युजलाई जानकारी दिए ।
माओवादी केन्द्रबाट सुदूरपश्चिम प्रदेश सरकारमा सहभागी हुन मन्त्री पठाउने क्रममा ५ जना सांसदले असहमती जनाएका थिए । संसदीय दल र पार्टीमा छलफल नगरी संसदीय दलका नेता मानबहादुर धामीले आफू खुशी मन्त्रीका नाम पेश गरेको भन्दै मन्त्री नियुक्ती प्रकृया रोक्न मुख्यमन्त्री दीर्घबहादुर सोडारीलाई पत्र नै पठाएका थिए । हाल सुदूरपश्चिम प्रदेशमा माओवादी केन्द्रबाट ओमविक्रम भाट सामाजिक विकास मन्त्री छन् भने अक्कल रावल र लक्ष्मी विक विनाविभागिय मन्त्री छन् ।
सुदूरपश्चिम प्रदेशमा माओवादी केन्द्रका सभामुखबाहेक १० जना सांसद छन् । भट्टको पक्षमा ५ र हालका दल नेता धामीको पक्षमा ५ जना सांसद रहेका छन् । भट्टलाई गत माघमा बहुमतको आधारमा संसदीय दलको नेताबाट हटाएर धामीलाई जिम्मेवारी दिइएको थियो ।
तत्कालिन समयमा धामीको पक्षमा ६ सांसद थिए भने भट्टको पक्षमा ४ सांसद थिए । हाल आएर धामीको पक्षमा रहेका सांसद शिवसिंह ओली भट्टको पक्षमा उभिएपछि दुबै जनासँग पाँच/पाँच सांसद रहेका छन् ।
हाल भट्टको पक्षमा रमेशसिंह धामी,शिवसिंह ओली,झपट साउद र जानकी कुँवर रहेका छन् । त्यस्तै धामीको पक्षमा ओमविक्रम भाट,लक्ष्मी विक,अक्कल रावल र गीतादेवी माल रहेका छन् ।
