माओवादी केन्द्रको पछिल्लो अवस्था,आगामी रणनीतिलगायत विषयमा नेकपा माओवादी केन्द्रका नेता तथा पूर्वमन्त्री अक्कलबहादुर रावलको कुराकानीमा आधारित विचार प्रस्तुत गरिएको छ ।
माओवादी आन्दोलन २०६४ सम्म राम्रो गतिमा थियो। त्यसपछि विभिन्न नामधारी समूह वा व्यक्तिहरुसङ्ग एकता र ध्रुवीकरणका नाममा आफ्नो मार्गदर्शन सिद्धान्त मालेमावाद र प्रचण्डपथ परित्याग ,लोकप्रिय नाम नेकपा माओवादी परिवर्तन र पार्टी भित्र अंशबण्डाको सुरुवात भयो।
ध्रुवीकरणको नाममा समूह विशेषलाई प्रशय दिनु, टुट्फुट र विभाजनले गर्दा वर्गसंघर्षको लडाइँबाट खारिएका नेतृत्वहरु तितरबितर हुनु, भुइँको टिप्न खोज्दा पोल्टाको सबै रित्तिदै जानुको परिणाम अहिले हामी भोग्दै छौँ।
अब यदी हामी पुनःजागृत हुने हो भने यो टुटेको कडिबाट सिलाउन थाल्नु पर्छ। सिङ्गो माओवादी आन्दोलनको बिरासत जोगाउन पर्छ। अन्य विचारधारा र प्रवृत्तिलाई पनि क्रमश: जोडेर लैजानु पर्छ।यो दीर्घकालीन महत्वको काम छोडेर साना-साना पसलहरु चलाइरहने र ती खुद्रे पसलहरु भित्र पनि गुट,निषेध र निजी स्वार्थको खेती गरिराख्ने हो भने कतै पुगिदैन। यो अन्तिम अवसर हामीलाई काङ्ग्रेस र एमाले मिलेर उपलब्ध गराइ दिएका छ्न।
उनीहरुलाई यो अवसर प्रदान गरेकोमा धन्यवाद दिँदै जनताका असली प्रतिनिधि हामी हौँ भन्ने सन्देश दिन जमिन र परिबेस सुहाउँदो कम्युनिस्ट पार्टी, सिद्धान्तनिष्ठ आचरण भएको नेतृत्व अहिलेको आवश्यकता हो। त्यसैले त्यो सुन्दर राजमार्गको दिगविजयी यात्रा तय गर्ने खरखजना जम्मा गरि गन्तव्य तय गर्न अब ढिला भएन र ?
