धनगढी- अविरल वर्षाका कारण कैलालीका विभिन्न नदीमा आएको बाढी बस्तीमा पस्दा ९९ परिवार प्रभावित भएका छन् ।
जिल्ला प्रशासन कार्यालय कैलालीका अनुसार जिल्लाको जानकी गाउँपालिका–४ सुकुम्बासी टोलका १५,कैलारी गाउँपालिका–७ बसन्ताका २४ र जोशीपुर गाउँपालिका–३ भितरियाका ६० परिवार घरभित्र पानी पसेर प्रभावित भएका छन् ।
उक्त परिवारका चार सय ४४ जना प्रभावित भएको जिल्ला प्रशासन कार्यालय कैलालीका सूचना अधिकारी शिवराज जोशीले जानकारी दिए । त्यस्तै बाढीबाट प्रभावित भएका ३४ परिवारका एक सय ३९ जनालाई सुरक्षित स्थानमा सारिएको उनले बताए ।
जानकी गाउँपालिका–४ का १५ परिवारका ३४ जनालाई उच्च सुरक्षित घरमा,जानकी गाउँपालिका–७ फरेलाका १७ परिवारका ९४ जनालाई पनि सुरक्षित घरमा र जोशीपुर गाउँपालिका–३ भितरियाका २ परिवारको ११ जनालाई जनहित सामुदायिक वनको भवनमा सारिएको उनले बताए ।
जानकी गाउँपालिकामा पथरीया,कैलारी गाउँपालिकामा कटैनी र जोशीपुर गाउँपालिकामा काँडा नदीको बाढीले प्रभावित गरेको जनाइएको छ । बुधबार देखिको लगातार वर्षाले कैलालीको जनजीवन प्रभावित भएको छ ।
