सुदूरपश्चिम प्रदेशमा यतिबेला माओवादी केन्द्रले वडा र पालिकाका अधिवेशनहरु गरिरहेको छ । केही जिल्लामा वडा र पालिकाका सम्मेलनहरु पनि सकिसकेको छ । हाल पार्टी गरिरहेका गतिविधि,आगामी योजना लगायतका बिषयमा माओवादी केन्द्रका सुदूरपश्चिम प्रदेशका सचिव जनकबहादुर बुढासँग  निशाना न्युजले गरेको कुराकानी प्रस्तुत गरिएको छ ।

सुदूरपश्चिममा माओवादी पार्टीको अवस्था कस्तो छ ?
पार्टीको अधिवेशन भएको तीन वर्ष भयो । गत मंसिर १२ गतेदेखि प्रदेशका नौवटै जिल्लाहरुमा वडा र पालिकाको अधिवेशनको कार्यक्रम चलिरहेको छ । हालसम्म ३२/३३ पालिकाको अधिवेशन सम्पन्न भइसकेको छ । दार्चुला,बझाङ र कैलालीले करिब वडा र पालिकाको अधिवेशन सम्पन्न गरिसकेका छन् । डडेल्धुरा,डोटी र बैतडीले करिब आधा पालिकाको अधिवेशन गरिसकेका छन् । कञ्चनपुर,अछाम र बाजुरामा चाहिँ अहिले वडा अधिवेशनको काम तीब्र गतिमा भइरहेको छ । पुस महिना भित्रै ८८ वटै पालिकाको र त्यो अन्तरगतका वडाहरुको अधिवेशन,पार्टी सदस्यता नवीकरण र पालिका अधिवेशनको काम टुङ्ग्याउने प्रकृयामा लागेका छौँ ।

प्रदेशको अधिवेशन कहिले हुन्छ ?
प्रदेशको समयावधि पुसमा सकिँदै छ । पुस २१ गतेदेखि पार्टी केन्द्रीय समितिको बैठक काठमाण्डौँमा बस्दैछ । मलाई लाग्छ केन्द्रीय समितिको बैठकले सबै प्रदेश समितिको अधिवेशनको मिति टुङ्ग्याउला ।

प्रदेशमा अबको नेतृत्व कस्तो आउला ?
अहिले हामीले जे जति उपलब्धि हासिल गरेका छौँ यो सबै अध्यक्ष हरिराम चौधरीलगायतको नेतृत्वमा भएका छन् । व्यक्तिगत टिकाटिप्पणी त कतिपयप साथीहरुबाट आग्रह पूर्वाग्रहले गर्छन होला । एउटा उत्पीडित र उपेक्षित समुदायकबाट वर्गसंघर्षको भट्टीबाट आएको सक्षम नेतृत्व नै हो उहाँ(हरिराम चौधरी) । यो बीचमा उहाँहरु कै नेतृत्वमा २०७४ मा स्थानीय तहमा हासिल गर्न नसकेको उपलब्धी २०७९ को निर्वाचनमा थप गर्न सकेका थियौँ ।

संगठनात्मक गतिविधि पनि तुलनात्मक ढंगले सशक्त रुपले अघि बढिरहेका छन् । सबै क्षेत्रमा हेर्दाखेरी अहिलेको हाम्रो नेतृत्वकै कारणले गर्दाखरी अगाडि बढेका छौँ । यसपछिको नेतृत्व कसले कसरी गर्छ भन्ने बिषयमा छलफल भइसकेको छैन् । खास गरेर पार्टी केन्द्र र हाम्रो अध्यक्षको स्प्रिड के देखिन्छ भने सबै माथि मात्रै जान थाले एक पटक तल फर्कौ । हामीले पनि प्रदेशमा के भनेका छौँ भने चार सय बढी प्रदेश कमिटीको सदस्य संख्या छ । हाम्रो विधानले एक सय २५ जना प्रदेश कमिटीको सदस्य संख्या निर्धारण गरेको छ । दुई तिहाइ प्रदेश कमिटी सदस्य संख्या तल पालिकामा एडजस्ट नहुने हो भने बेरोजगार हुने अवस्था छ । साथीहरु पालिका एउटा महत्वपूर्ण ठाउँ हो त्यहाँ तपाइहरुले एडजस्ट हुनुपर्छ भनेका छौँ । प्रदेशमा ७९ जना केन्द्रीय समितिका सदस्य छन् । दुई सय ९९ सदस्यीय केन्द्रीय समिति बन्छ । बढीभन्दा बढी यो प्रदेशबाट १५/२० जना जाने हो । बाँकी यहाँको दुई तिहाइ केन्द्रीय सदस्य कहिँ न कहिँ व्यवस्थापन हुनुपर्छ । त्यसैले माथिबाट तल आउने कुरा पनि हुन सक्छ । त्यो भएकाले म उ भन्दा पनि भोलि परिस्थिति कस्तो आउँछ । त्यो अनुसार अगाडि बढ्ने कुरा होला । पार्टी केन्द्रका पनि निर्देशन रहला । कार्यकर्ताका भावनाका कुरा पनि होलान ।

भर्खरै सम्पन्न स्थानीय तहको उपनिर्वाचनमा माओवादी केन्द्रले प्राप्त गरेको नतिजाबाट कत्तिको उत्साहित हुनुहुन्छ ?
हाम्रो प्रदेशको हकमा हामीले परिणाम त निकाल्न सकेनौँ । हामीले हिजोको दिनमा एउटा गठबन्धनमा दार्चुलाको दुहुमा हामीले जितेको वडा हो । बझाङको सुर्मा–४ मा अघिल्लो निर्वाचनमा उम्मेदावारै पाएको वडा हैन् । डोटीमा पनि एकदम कमजोर ठाउँ हो । कञ्चनपुरमा पनि त्यस्तै प्रकृतिका कमजोर ठाउँ हुन् । हाम्रा असाध्यै कमजोर ठाउँमा हामी यतिवेला चुनाव लडेका थियौँ । नतिजा निकाल्न नसके पनि उम्मेवार नपाएका ठाउँमा उम्मेदवार पायौँ । एक्लै लड्दा पनि मत चाहीँ घटेको छैन् । देशभरीको नतिजा हेर्दा राम्रो आएको छ ।

तीन महिने जनतासँग माओवादी रुपान्तरण अभियानले कस्तो प्रभाव पा¥यो ?
हामीले एक वर्ष पहिले सञ्चालन गरेको जनतासँग माओवादी रुपान्तरण अभियानले असाध्यै प्रभाव पारेको छ । त्यसले संगठन नबनेको ठाउँमा पनि हाम्रो संगठन बन्यो । एक जिल्लाबाट अर्को जिल्ला,एउटा पालिकाबाट अर्को पालिका कार्यकर्ताहरुको पनि विन्यास भयो । शान्ति प्रकृयामा आइसकेपछि माओवादीले अन्तर जिल्ला,अन्तरपालिकामा कार्यविभाजन तर्जमा गरेको पहिलो पटक हो ।
देशभरीको अहिलेको उपनिर्वाचनको परिणाम त्यसको प्रभाव पनि हो । अध्यक्ष पुष्पकमल दाहाल प्रचण्डको नेतृत्वको १८ महिने कार्यकालमा गरेका राम्रा काम कारबाहीको परिणाम पनि हो । यो अभियानले खासमा सकरात्मक नतिजा ल्यायो ।

जनताको निराशालाई आशामा बदल्ने यहाँको पार्टीले कस्तो कदम चाल्छ ?
यो समग्रको पार्टीको नीतिसँग सम्बन्धित कुरा हो । स्थानीय तहको कडीलाई नै जोड्दाखेरी अहिले जुन ठाउँमा स्थानीय तहको उपनिर्वाचन भयो यस्ले माओवादी पार्टी पंतिमा ठूलो उत्साह ल्यायो । माओवादी सक्कियो कसैको टेको नटेकी चुनावै लड्न सक्दैन्, विपक्षी र बिरोधीहरुले यसपछिको चुनावमा माओवादीलाई भूगोलमा होइन् गुगलमा खोज्नुपर्छ भन्ने अफवाह फैलाइरहेको अवस्थामा चाहिँ अब माओवादी आफ्नै सामथ्र्यमा चुनाव लड्न सक्ने शक्ति हो भन्ने पनि प्रमाणित गरेको छ । कसैले केही नभने पनि कार्यकर्ताहरुमा यो परिणामले एउटा उत्साह ल्याएको छ ।

यो परिणामले माओवादीले भन्ने मात्र होइन् कांग्रेस र एमालेको तुलनामा मौका पायो भने काम गर्न सक्दो रहेछ भन्ने हाम्रो नेतृत्वको सरकारले १८ महिने अवधिमा सुशासनको पक्षमा,भष्ट्राचार नियन्त्रणको पक्षमा लगायत विभिन्न जुन दर्जनौ काम गरे त्यसको परिणाम हो ।
हामी जनताकै बीचमा छौँ । जनताकै पक्षमा छौँ । व्यक्तिगत रुपमा अहिले हामी पार्टी संगठनकै काममा जुटिरहेका छौँ ।

आगामी योजना के छन् ?
तत्काल हामी अधिवेशन कै प्रकृयाबाट अगाडि बढेका छौँ । समग्र देशको चित्र कसरी अगाडि बढ्छ । पार्टीलाई कसरी अगाडि बढाउने,आगमी कार्यक्रम के गर्ने भन्ने यही २१ गतेदेखि काठमाण्डौँमा हुने केन्द्रीय समितिको बैठकले नै कार्ययोजना तर्जुमा गर्छ । केन्द्रीय समितिले कार्ययोजना तयार गरेपछि त्यसलाई कार्यान्वय गर्ने पट्टी हामी लाग्छौँ । मलाई लाग्छ देशभरी माओवादी प्रतिको जागरण पैदा हुन्छ । ०८४ लाई केन्द्रमा राखेर अहिलेको सरकारका गलत कदमको भण्डाफोर गर्ने,जनपरिचालन,कार्यकर्ता परिचालन गर्ने, आफ्नो शक्तिलाई सुदृढ गर्ने प्रकारको योजना बन्छ जस्तो लाग्छ ।