धनगढी । कैलालीको धनगढीमा सोमबार देखि बुधबार सम्म भुवा पर्व मनाइने भएको छ ।
बाजुरेली सेवा समाज धनगढीले आज पत्रकार सम्मेलन गर्दै धनगढी उपमहानगरपालिकाको-१ खुल्ला मञ्चमा तीन दिन भुवा पर्व मनाइने भएको हो।
बाजुरेली सेवा समाजका सचिव भरत केसीका अनुसार भुवा पर्व उत्सवका रुपमा मनाउने तयारी छ । केसीका अनुसार भुवा प्रदर्शनीसंगै प्रतियोगिता पनि आयोजना गरिएको छ ।
प्रतियोगितामा कैलालीको चौमला, रामशिखरझाला, अत्तरिया, फुलबारी, सुर्मादेवी समाज धनगढी र बाजुरेली सेवा समाजको टिम सहभागिता हुने छ ।
सुदूरपश्चिमका बाजुरा, बझाङ, अछामलगायत जिल्लामा भुवा पर्व प्रत्येक वर्ष पुसे औँसीको अघिल्लो दिनदेखि सुरू हुन्छ । पछिल्लो समय सुदूरपश्चिमको कैलाली र कञ्चनपुरमा पनि यो पर्व मनाउन थालिएको हो ।
