नेकपा एमालेका स्थायी कमिटी सदस्य कर्णबहादुर थापाले आफ्नो फेसबुक वालमा धाराबाहिक विचार प्रस्तुत गर्न थालेका छन । उनले आफ्ना विचार प्रस्तुत गर्दै भनेका छन्–
जन्मले वा आदर्शले अहिलेसम्म कोही तानाशाह बनेको इतिहास छैन । सत्ता, शक्ति र म भन्ने भावबाट तानाशाही चेतनाको जन्म हुन्छ । त्यो चेतनासंग जब जनता सहमत हुँदैनन् ।
त्यसपछि जन आवाजलाई दवाउनको लागि तानाशाही सत्ताको जन्म हुन्छ । तानाशाही राज्य टिक्दैन, संसारको इतिहासले प्रमाणित गरेको सत्य हो तर त्यसले देश जनतालाई ठूलो हैरानी दिने गर्छ ।
तानाशाही राज्यमा पुग्न नपाउँदै तानाशाही चेतनालाई लगाम लगाउन सकेमात्रै देश र जनतालाई नोक्सानीबाट जोगाउन सकिन्छ । यो सैद्धान्तिक बिषयलाई जीवन व्यवहारमा जाचौँ, बुझौँ र आत्मसाथ गरौँ ।
मुल्य,मान्यता र आदर्शहिन राजनीति, त्याग,कष्ट र धैर्यता नभएको राजनीतिज्ञ तथा समाजप्रति जवाफदेहीता नभएको नागरिक र नागरिक समाज मानवजातिकै बिनासको कारण बन्न सक्छ ।
गम्भीरतापूर्वक सोचौँ । सामाजिक उत्तरदायित्व बढाउन समयमै पहलकदमीलाई अगाडि बढाऔँ । राजनीतिका दुईवटा बाटो हुने गर्दछ । एक सत्ता र शक्तिको गुलाम बन्ने ।
आशिर्वादबाट पाएका पद खाने, त्यसैमा रमाउने । दोश्रो विवेकले देखेको सत्यमा उभिने, उभिए बापत आई लाग्ने चुनौतीको सामना गर्ने र आफूले चाहेको सत्ता निर्माण गर्ने ।
पहिलो मार्गले पद त पाइन पनि सक्छ तर स्वाभिमान र विवेक पटकपटक बन्दकमा राख्नु पर्दछ । दोश्रो मार्गले मान्छे आफ्नो स्वत्व सहित बाँच्छ । र, स्वाभिमान र विवेकलाई बन्दक राख्नु पर्दैन । पद बरू नहुन सक्छ ।
जीवनको अन्त्यमा कुनै व्यक्तिसंग पद रहँदैन । स्वाभिमानीको सम्मान मरेर गए पनि भइरहन्छ । पदका लागि विवेक बन्दक राख्नेहरू जिउँदो रहदै पटकपटक मरिसकेको हुन्छ । रोजाई आफ्नो आफ्नो, बाटो आफ्नो आफ्नो ।
