कैलाली । सिवाईसी अत्तरिया क्रिकेटको शहर धनगढीमा भईरहेको अर्जुन ट्रफी राष्ट्रिय क्रिकेट प्रतियोगिताको फाईनलमा प्रवेश गरेको छ । गो ड्रिर्मसको आयोजनामा भईरहेको प्रतियोगिताको दोस्रो सेमिफाईनलमा डिसिए धनगढीमाथि रोमाञ्चक जित हात पार्दै अत्तरिया उपाधि नजिक पुगेको हो ।

फाप्ला अन्तराष्ट्रिय क्रिकेट मैदानमा भएको खेलमा डिसिए धनगढीमाथि ६ विकेटको जित सहित अत्तरिया उपाधि नजिक पुगेको हो । सिवाईसी अत्तरियाले फेण्ड्स क्लब डडेल्धुरासँग उपाधिका लागि प्रतिस्पर्धा गर्नेछन् । फाईनल खेल सोमबार दिउँसो फाप्ला अन्तराष्ट्रिय क्रिकेट मैदानमा हुनेछ ।
आईतबार भएकोदोस्रो सेमिफाईनल खेलमा टस जितेर पहिले ब्याटिङ गरेको धनगढीले २० ओभरमा सवै विकेट क्षतिमा एक सय ८ रन मात्रै बनाउन सक्यो ।

धनगढीका लागि मिलन बोहोराले १८ बलमा २८ रन बनाए । अभिषेक पालले २७ रन, दिपेन्द्र सिंह ऐरीले १५ रन र राहुल भण्डारीले १३ रन बनाए । अन्य खेलाडीहरुले दोहोरो रन अंक छुन नसकेको अवस्थामा डिसिए धनगढीका ४ खेलाडी शुन्यमा आउट भए । अत्तरियाका लागि विवेक उदव र कमल गुप्ताले दुई दुई विकेट लिए । दिपेश कँडेल, रसिद खान र साहव आलमले एक एक विकेट लिए ।
एक सय ९ रनको लक्ष्य बोकेर मैदान उत्र्रिएको सिवाईसी अत्तरियाले १५ ओभरमा ५ विकेट क्षतिमा विजय लक्ष्य पुरा गर्यो । अत्तरियाका लागि शंकर रानाले अर्धशतक सहित अविजित ५६ रन बनाए ।

५५ बलको सामना गरेका उनले ४ छक्का र ३ चौका प्रहार गरे । टीमका लागि दिपेश कँडेलले २४ रन बनाए । शंकरले दिपेशसँग चौथो विकेटका लागि ७१ रनको साझेदारी समेत गरे । अत्तरियाका लागि भीम सार्कीले १६ रन बनाए ।

डिसिए धनगढीका लागि हिक्मत महराले दुई विकेट तथा ललीत राजवंशी र भोजराज भट्टले एक एक विकेट लिए पनि आफ्नो टोलीलाई जिताउन सकेनन् । अत्तरियाका लागि अविजित ५६ रनको पारी खेलेका शंकर राना नवजीवन सहकारी संस्था प्लेयर अफ द म्याच भए । उनले नगद १० हजार सहित ट्रफी पाए ।
प्रतियोगिता अन्तर्गत भोली प्रतियोगिताको फाईनलका खेल हुनेछ ।नेपाल क्रिकेट संघको बार्षिक क्यालेण्डरमा समावेश भएको प्रतियोगिताको विजेताले नगद १० लाख र उपविजेताले नगद ५ लाख सहित ट्रफी पाउनेछन् ।

धनगढी र सुदुरपश्चिम प्रदेशको क्रिकेटका सारथी रहेका स्वर्गीय अर्जुन खड्कालाई समर्पित गर्दै आयोजना गरिएको प्रतियोगिताको सर्वोकृष्ट खेलाडीलाई नगद एक लाख प्रदान गरिनेछ । उत्कृष्ट ब्याट्सम्यान, उत्कृष्ट बलर र उदयमान खेलाडीले जनही ५०÷५० हजार पाउनेछन । प्रत्येक खेलका म्यान अफ द म्याचलाई नगद १० हजार प्रदान गरिनेछ ।

दशौ राष्ट्रियको छनोट खेल्न आएका बैतडीका हरिशले अर्जुन ट्रफीमा जिते नगद ५० हजार

क्रिकेटको शहर धनगढीमा जारी अर्जुन ट्रफी राष्ट्रिय क्रिकेट प्रतियोगितामा बैतडीको पाटन खोड्पेका हरिश भाटले नगद ५० हजार पुरस्कार जितेका छन् ।

आज भएको दोस्रो सेमिफाईनल खेलमा छक्का प्रहार भएको बललाई समातेका हरिशले ब्रेड बक्सको तर्फबाट नगद ५० हजार प्राप्त गरेका हुन् । ब्रेड बक्सले सेमिफाईनल खेलमा प्रहार भएको छक्का समात्ने पहिलो दर्शकलाई नगद ५० हजार पुरस्कार घोषणा गरेको थियो ।
पहिलो सेमिफाईनलमा कुनै क्याच भएको थिएन भने दोस्रो सेमिफाईनल खेलमा हरिशले पहिलो क्याच गरेका हुन् ।

प्रतियोगिताभरीमा उनले पहिलो मैदान बाहिर गएको बल क्याच गरेका हुन् । उनी धनगढीमा भएको दशौ राष्ट्रिय खेलकुद प्रतियोगिताको छनोट प्रतियोगिता खेल्न हिजो मात्रै धनगढी आएका हुन् ।
एथलेटिक्स खेलाडी रहेका उनी जिल्ला छनोट प्रतियोगितामा भएर प्रदेश छनोट खेल्न आएका हुन् । ज्याभलिङ थ्रो का खेलाडी हरिश साथीहरुले क्रिकेट हेर्न जाउ भनेपछि फाप्लामा आएको बताए ।

उडेर आएको बललाई पछाडी सरेर क्याच गर्न सफल भएको उनले बताए । नगद ५० हजार प्राप्त गरेका उनले त्यो रकमलाई आफ्नो खेलमा नै लगानी गर्ने बताए । उनले नगद ५० हजार सहित खल्तीको तर्फबाट एयर बड समेत पाएका छन् ।
प्रतियोगिताको फाईनल खेलमा दर्शकले क्याच गरेमा ब्रेड बक्सले नगद एक लाख प्राप्त गर्ने भएका छन् । त्यसका लागि दर्शकले टिकट काटेको हुनुपर्ने आयोजकले जनाएको छ ।