धनगढी– कैलालीको धनगढी उपमहानगरपालिका वडा नम्बर १३ राजपुरमा चार दिनेसम्म निःशुल्क आयुर्वेद स्वास्थ्य शिविर सञ्चालन हुने भएको छ ।
धनगढीमा शनिबार पत्रकार सम्मेलनको आयोजना गर्दै प्रादेशिक आयुर्वेद चिकित्सालयले यही ११ गते देखि १४ गतेसम्म निःशुल्क आयुर्वेद स्वास्थ्य शिविर सञ्चालन गर्ने भएको हो । प्रादेशिक आयुर्वेद चिकित्सालयले ११ गतेदेखि निरन्तर रुपमा निःशुल्क ओपीडी सेवा समेत सञ्चालन गर्ने भएको छ ।
शिबिरमा बाथरोग,अम्लपित(ग्यास्ट्रिक),कलेजो सम्बन्धी रोगहरु (जण्डिस),उदर (पेटसम्बन्धी रोग),स्त्री रोग,उच्च रक्त चाप,मधुमेह (सुगर), त्वक बिकार (छाला सम्बन्धी रोग), पिसाब सम्बन्धी रोगहरु, अर्श (पाइल्स), फिष्टुलालगायत समस्याहरुको उपचार तथा परामर्श हुने छ ।
यस्तै निःशल्क ल्याब सेवा, निःशुल्क, औषधी वितरण र गयोग परामर्श सेवा हुने चिकित्सालयले जनाएको हो । प्राविधिक कारणले गर्दा चिकित्सालयले उद्घाटनमा ढिलाइ भएको प्रादेशिक आयुर्वेद चिकित्सालयका निमित निर्देशक डाक्टर खगेन्द्रबहादुर बमले बताए । सुदूरपश्चिमकै पहिलो चिकित्सालय रहेको उनले दाबी गरे ।
आयुर्वेद चिकित्सालय सम्बन्धी प्रचारप्रसारको समेत कमी रहेको उनले बताए । चिकित्सालय ५० बेड रहेको र ३५ जना चिकित्सकहरको दरबन्दी रहेको उनको भनाइ छ ।
३५ जना मध्य पाँच जना विशेषज्ञ डाक्टर, आयुर्वेद कविराज चार जना, स्टाप नर्स दुई जना, ल्याब टेक्निसियन एक जना, प्राकृतिक चिकित्सक एक जना, होमी प्याथोलोजिक एक जना, रेडियोग्राफी एक जना र अन्य प्रशासनमा लगाएर ३५ जना कर्मचारी बमले बताए ।
प्रादेशिक आयुर्वेद चिकित्सालय सञ्चालक समितिका अध्यक्ष नरेश बिष्टले चिकित्सालयलाई पहिला शिबिरका रुपमा सञ्चालन गने र शिविरमा आएका बिरामीहरुलाई बेड भर्ना गरेर त्यसपछि अन्य सेवाहरु सञ्चालन गर्ने जाने बताए । सञ्चालक समितिले अहिलेसम्म पूर्णता नपाउँदा चिकित्सालय सञ्चालनमा ढिलाइ भएको उनले बताए ।
