काठमाडौं- नेपाली क्रिकेटले पछिल्लो एक दशकमा हासिल गरेको ठूलो उपलब्धि भनेको टी–२० विश्वकप खेल्नु र एकदिवसीय मान्यता पाउनु हो । यसबाहेक नेपालले क्रिकेटमा सोचेअनुरूप प्रदर्शन गर्न सकेको छैन । नेपालसँगैको अफगानिस्तानले भने विश्व क्रिकेटमा प्रशंसनीय प्रगति गरिरहेको छ ।

सरकारको बेवास्था, क्रिकेट पूर्वाधार अभाव, क्यानको कमजोर कार्यशैलीलगायतले नेपालको क्रिकेट पाँच वर्षअघिकै अवस्थामा छभन्दा फरक नपर्ला । नेपाली क्रिकेटको प्रगति हुन नसक्नुको सबैभन्दा कमजोर पक्ष भनेको घरेलु क्रिकेट संरचना बलियो नहुनु पनि हो । ग्रासरुट कमजोर हुँदा नै नेपालले क्रिकेटमा प्रगति गर्न सकेको छैन ।

साथै, स्तरीय ठाउँमा क्रिकेट खेलिरहेका नेपाली खेलाडीलाई प्रोत्साहन अर्थात् सम्मानपूर्वक आफ्नै देशबाट खेल्ने वातावरण निर्माण नगर्दा पनि समस्या भइरहेको छ । छिमेकी देश भारतमै पनि थुप्रै नेपाली खेलाडी छन्, जो त्यहाँको घरेलु क्रिकेट खेलिरहेका छन् । जहाँ उनीहरूले स्तरीय प्रशिक्षण पाएका छन् । र, उनीहरूले प्रदर्शन पनि राम्रो गरेका छन् ।

भारतको घरेलु क्रिकेटमा राम्रो गरिरहेकामध्ये एक हुन्– जय विष्ट । उनको पुख्र्यौली घर अछाम जिल्लाको बयलपाटा हो । जयकाअनुसार उनको घर धनगढीमा छ । तर, उनी हाल भने मुम्बईमा बस्छन् । २६ वर्षीय जयले घरेलु क्रिकेटमा मुम्बई र उत्तराखण्डबाट खेल्ने गरेका छन् । हालसम्म उनले प्रथम श्रेणी क्रिकेटमा ५५ पारी खेलेका छन् । जसमा उनले चार शतक र ६ अर्धशतकको मद्दतमा १ हजार ७१० रन बनाएका छन् ।

उनले प्रथम श्रेणी क्रिकेटमा १८ विकेटसमेत लिएका छन् । जयले लिस्ट ‘ए’ मा २५ म्याच खेलेका छन् । जसमा उनले आठ अर्धशतक र एक शतकको मद्दतमा १ हजार १९ रन बनाएका छन् । लिस्ट ‘ए’ मा उनको उच्च स्कोर १४१ रन हो । त्यस्तै, जयले ३३ टी–२० मा सात अर्धशतकको मद्दतमा १ हजार १ रन बनाएका छन् । यो प्रारूपमा उनको उच्च स्कोर ९२ रन हो । जयले प्रथम श्रेणीमा ७८।५४, लिस्ट ‘ए’ मा ८९।८५ र टी–२० मा १३६।३७ को स्ट्राइक रेटमा रन बनाइरहेका छन् ।

जयले नेपालबाट खेल्लान् ?

लामो समयदेखि नेपाली समर्थकले नेपाली क्रिकेटमा जयको प्रतीक्षा गरेका छन् । समर्थकले उनलाई नेपाल बोलाउनुपर्ने क्यानसमक्ष आग्रह गर्दै आएका छन् । तर, जयले भने तत्काल नेपाल आउने मनसाय बनाएका छैनन् । मुम्बईको स्तरीय प्रशिक्षणमा रमाइरहेका उनले नेपालका लागि खेलेमा ब्याटिङमा केही सुधार देख्न पाइने समर्थकको आशा छ ।

जय शीर्ष क्रमका ब्याटर हुन् । उनी प्रायः ओपनिङ वा तेस्रो नम्बरमा ब्याटिङ गर्छन् । यदि जय नेपालका लागि खेल्न सहमत भए एकहदसम्म ओपनिङ र तेस्रो नम्बर ब्याटिङको समस्या टर्नसक्छ । तर, तत्काल उनले नेपालका लागि खेल्ने सम्भावना कम रहेको जयका आफन्त र छिमेकी बताउँछन् । उनले सूर्यकुमार यादव, श्रेयस अय्यर, शार्दुल ठाकुर, पृथ्वी शालगायत भारतीय स्टार खेलाडीसँगै खेलिसकेका छन् ।

जयले रणजी ट्रफी, सैयद मुस्ताक अली ट्रफीलगायत भारतका प्रतिष्ठित प्रतियोगिता खेल्ने गरेका छन् । लामो समय मुम्बईको टोलीबाट खेलिरहेका उनी हाल उत्तराखण्डको टिममा छन् । जय उत्तराखण्डको टिम कप्तानसमेत हुन् ।

उनको नामको टिकटक आइडी भाइरल

सामाजिक सञ्जाल टिकटकमा जयको नामबाट एकजना सक्रिय रहेका छन् । भारतमा टिकटकमाथि प्रतिबन्ध लगाइएको छ । तर, जयको नामबाट भने लगातार सामग्रीहरू पोस्ट भइरहेका छन् । धेरै समर्थकले रियल आइडी ठानेर कुराकानी पनि गरेका छन् । र, त्यो जय विष्टको ‘फेक’ आइडीले धेरै टिकटक प्रयोगकर्तालाई जवाफ पनि पर्काएको छ । यसैबीच, उनको त्यो आइडीबाट ‘जय नेपाल आएर नागरिकता बनाउँदै’ भनेर एउटा सामग्री भाइरल भइरहेको छ ।

‘अब छिट्टै नेपाल आउँदैछु, नेपालमा खेल्छु एकदिन । अहिले नागरिकता बनाउनु छ, त्यसपछि सोच्ने हो,’ जयको त्यो फेक आइडीमा भनिएको छ । आफूबारे टिकटकमार्फत् लगातार गोप्य कुरा सार्वजनिक भइरहँदा जयकोतर्फबाट भने हालसम्म कुनै पनि आधिकारिक धारणा सार्वजनिक भइसकेको छैन । उनका आफन्त वा साथीभाइले चाहिँ त्यो आइडी ‘फेक’ भन्ने गरेका छन् । क्रिकेटपाटी