धनगढी । कैलालीको गोदावरी नगरपालिका–१ बसन्तपुरस्थित सडकमा मंगलबार सुत्केरी व्यथाले छट्पटाइरहेकी एक गर्भवती महिलालाई सुरक्षित प्रसूति हुन सहयोग गरेकी प्रहरी जवान चन्द्रिका देउवा अहिले चर्चामा छन् ।

देउवाले बझाङको थलारा गाउँपालिकाकी चन्द्रा आचार्य सुरक्षित प्रसूति हुन सहयोग गरेकी थिइन् । देउवाकै सहयोगमा आचार्यले बच्चा(छोरा) जन्माइन् । देउवाले सुत्केरी र बच्चालाई लिएर अत्तरियास्थित पद्मा अस्पतालसम्म पु¥याएकी थिइन् । देउवा स्वास्थ्य क्षेत्रको ज्ञान भएकी स्वास्थ्यकर्मी पनि होइनन् । तर उनले सुत्केरी व्यथाले छट्पटाई रहेकी आचार्यलाई जोखिम मोलेर प्रसूति हुन सहयोग गरेकी थिइन् ।

स्थानीयले छुन पनि नमानेको अवस्थामा प्रहरी चौकी खैरानामा कार्यरत प्रहरी जवान देउवाले आचार्यलाई सुरक्षित सुत्करी हुन सहयोग गरि आमा र बच्चा दुबैको ज्यान जोगाउने काम गरेको भन्दै चारैतिर चर्चा समेत भयो ।

देउवाले आचार्यलाई प्रसूति हुन सहयोग गर्दै गरेको भिडियो सामाजिक सञ्जालमा एकाएक भाइरल पनि भयो ।
सामाजिक सञ्जालमा उनको निकै प्रशंसा पनि भयो । सामाजिक सञ्जालमा प्रशंसा पाएकी देउवाले आफ्नै संगठनबाट भने सम्मानपत्रहित रेकर्डमा जनिने गरि पुरस्कृत मात्रै भइन् बढुवा भइनन् । सुरक्षित प्रसूति गराउन सहयोग गर्ने प्रहरी जवान देउवाको बढुवाको कुनै सुरसार छैन ।

देउवालाई बुधबार जिल्ला प्रहरी कार्यालय कैलालीले रेकर्डमा जनिने गरि सम्मानसहित पुस्कृत त ग¥यो तर बढुवामा परिनन् । जिल्ला प्रहरी कार्यालय कैलालीका प्रमुख प्रहरी उपरीक्षक बालनरसिंह राणाले देउवालाई प्रशंसा पत्रसहित पुरस्कृत गरेका थिए । साहसिक कार्य गरेकी देउवाको बढुवा नभएको भन्दै अहिले आलोचना हुन थालेको छ ।

तर,नेपाल प्रहरीले विश्वको सर्वोच्च शिखर सगरमाथा आरोहण गरेकी नेपाल प्रहरीकी सहायक निरीक्षक (असई) कुन्जाङ छोपेल शेर्पाको विशेष बढुवा गरेको छ ।

बुधबार प्रहरी महानिरीक्षक दीपक थापाको अध्यक्षतामा बसेको बैठकले शेर्पालाई प्रहरी नायव निरीक्षक (सई) मा बढुवा गर्ने निर्णय गरेको हो ।

शेर्पाले विश्वको सर्वोच्च शिखर सगरमाथा सफलतापूर्वक आरोहण गरी संगठनको गौरव बढाउन सफल भएको भन्दै उनको विशेष बढुवा गरिएको छ ।

सगरमाथाका आरोहण गरेकी प्रहरी नायव निरिक्षक कुन्जाङ छोपेल शेर्पाको बढुवा हुने सुत्केरी व्यथाले छट्पटाइरहेकी एक महिलालाई सुरक्षित प्रसूति गराउन सहयोग गरेकी प्रहरी जवान देउवाको बढुवा नहुनुले दुःखी तुल्याएको स्थानीयले बताएका छन् ।

प्रहरी जवान देउवाले जोखिम उठाएर एउटासडकमा छट्पटिरहेको अवस्थामा गर्भवति महिलाको उद्धार गर्दा पनि बढुवामा नसमेटिनु गम्भीर बिषय भएको स्थानीयको भनाइ छ । जिल्ला प्रहरी कार्यालय कैलालीका डिएसपी राजकुमार सिंहले देउवाको बढुवाको कुनै जानकारी नभएको निशाना न्युजलाई जानकारी दिए ।

शेर्पाले सोमबार बिहान ८ः५६ बजे सफलतापूर्वक सगरमाथा आरोहण गरेकी थिइन् । शेर्पा सगरमाथा चढ्ने पहिलो महिला प्रहरी अधिकारी हुन् ।