ऐश्वर्य बहुमुखी क्याम्पस सुदूरपश्चिमकै एउटा नमूना क्याम्पस हो । सर्वोत्कृष्ट नतिजा ल्याउँदै आएको यस क्याम्पसले संस्कारसहितको शिक्षा दिँदै आएको छ । यसै क्याम्पसका क्याम्पस प्रमुख प्रा. धर्मदेव भट्टको कुराकानीमा आधारित विचार प्रस्तुत गरिएको छ ।

ऐश्वर्य बहुमुखी क्याम्पस सुदूरपश्चिमको एक शैक्षिक धरोहर ऐश्वर्य विद्या निकेतनबाट सञ्चालित सामुदायिक क्याम्पस हो । २०६३ सालमा त्रिभूवन विश्वविद्यालयबाट विएससीको सम्बन्धन प्राप्त गरेर तत्कालीन सेती अञ्चलको पहिलो विज्ञान क्याम्पसका रुपमा सञ्चालन भएको थियो ।

तत्पश्चात समाजको आवश्यकता र चाहना अनुसार २०६४ सालमा त्रिभूवन विश्वविद्यालयबाट बिबिएस कक्षा सञ्चालन गर्न सफल भयौँ भने अहिले आएर २०७८ सालमा त्रिभूवन विश्वविद्यालयबाट नै एमबिएस कक्षा सञ्चालन गरि राष्ट्रिय स्तरमै सर्वोत्कृष्ट नतिजा लिन सफल भएका छौँ । यसका लागि सम्पूर्ण प्राध्यापक,कर्मचारी,विद्यार्थी,अभिभावकलाई धन्यवाद दिन चाहान्छु ।

यो क्याम्पसको विशेषता भनेको गुणस्तरीय शिक्षा दिने संस्था हो । क्याम्पसको जननी संस्था ऐश्वर्य विद्या निकेतनले कक्षा १२ मा भर्खरै सर्वोत्कृष्ट नतिजा ल्याएको छ । त्यही बेसमा क्याम्पसले पनि सर्वोत्कृष्ट नतिजा दिन सफल भएको छ । बिएससी,बिबिएसमा पनि राम्रो नतिजा ल्याएको छ । एमबिस पहिलो सेमेस्टरमा ९५ प्रतिशत उत्र्तीण भएका छन् ।

यहाँ गुणस्तीय शिक्षा भएकै कारणले प्रदेशका नौ वटै जिल्लामात्रै नभएर विभिन्न भेग,क्षेत्रका विद्यार्थीको रोजाइमा यो क्याम्पस पर्न सफल भएको छ । साच्चे नै भन्ने हो भने ऐश्वर्य बहुमुखी क्याम्पस एउटा शैक्षिक वातावरण दिने संस्थामात्रै नभएर शिक्षासँगै रोजगारी दिन सक्ने संस्थाका रुपमा स्थापित भइसकेको छ ।

हामीले संस्कारसहितको शिक्षा दिन खोजिरहेका छौँ । विद्यार्थीहरु किताबी ज्ञानले मात्रै भरिपूर्ण हुन भन्ने हामी सोच्दैनौँ उहाँहरुको व्यक्तित्व विकास,संस्कार,बानीव्यवहार राम्रो बनाउनका लागि हामीहरुले विभिन्न तह र तप्काका विज्ञहरु बोलाएर परामर्श,छलफल तथा विविध कार्यक्रम गर्दै गएका छौँ ।

यो समुदायको सम्पत्ति भएका कारणले हामीले समाजलाई केही दिन सक्नु पर्दछ भन्ने उदेश्यका साथ विभिन्न क्षेत्रका विज्ञलाई ल्याएर विद्यार्थीलाई विभिन्न किसिमका कार्यक्रममा सहभागी गराएर उहाँहरुको आवश्यकता अनुसार हामी कक्षाहरु दिन सफल भएका छौँ । यसबाट विद्यार्थी,अभिभावकहरु खुशी हुनुहुन्छ ।

यहाँ योग्य प्राध्यापकहरु हुनुहुन्छ । क्वीएए सर्टिफाइड कलेज हो । प्रदेशको नमूना क्याम्पस हो । एउटा कलेजको पहिचान भनेको क्वीएए हो । यसको एक चरण पास गरेर दोस्रो चरणमा गइसकेका छौँ ।

यो एउटा सुदूरपश्चिमको सम्पत्ति,पहिचान हो यसको सम्बद्र्धन,प्रवद्र्धन गर्न प्रदेश सरकार ,स्थानीय सरकार,संघीय सरकार,राजनीतिक दल,मिडियाकर्मी तथा सिंगो शिक्षाप्रेमी तह र तप्काको उत्तिकै उत्तरदायीत्व छ जस्तो मलाई लाग्दछ । त्यसकारण यसलाई अझ राम्रो बनाउनका लागि यहाँहरुको सल्लाह सुझावको पनि अपेक्षा गरेको छु ।