धनगढी । कैलालीको गेटास्थित सहिद दशरथ चन्द स्वास्थ्य विज्ञान विश्वविद्यालयलाई तत्काल सञ्चालनको माग गर्दै प्रधानमन्त्री, शिक्षा मन्त्री र स्वास्थ्य मन्त्रीलाई ज्ञापनपत्र बुझाइएको छ। सहिद दशरथ चन्द स्वास्थ्य विज्ञान विश्वविद्यालय स्थापनार्थ संघर्ष समितिले मंगलबार कैलालीका प्रमुख जिल्ला अधिकारी कृष्णप्रसाद लम्साल मार्फत ज्ञापनपत्र बुझाइएको हो।

२०८० सालमा विधेयक पारित भइ २०८२ जेठ ४ गते प्रतिनिधिसभाबाट स्वीकृत र राष्ट्रपति मार्फत प्रमाणीकरण भइसकेको उक्त विश्वविद्यालय अझै कार्यान्वयनमा आउन नसक्दा स्थानीयवासी निराश भएको भन्दै सरकारसँग ऐन कार्यान्वयन गर्न ज्ञापनपत्रमा माग गरिएको छ। संघर्ष समितिले विश्वविद्यालयको संरचना तयार गर्न, पदाधिकारी नियुक्ति प्रक्रिया अगाडि बढाउन र उच्चस्तरीय स्वास्थ्य सेवा प्रदान गर्न र शैक्षिक कार्यक्रम सुरू गर्न सरकारको ध्यानाकर्षण गराएको छ।

‘सुदूरपश्चिमको जनताले गुणस्तरीय स्वास्थ्य सेवा, चिकित्साशास्त्र अध्ययन अध्यापन, अनुसन्धान तथा रोजगारीको लागि यो विश्वविद्यालयलाई अत्यन्तै जरुरी मान्दछन्। तर, सरकारले आवश्यक पहल नगर्दा यो ऐतिहासिक विश्वविद्यालय अझै सञ्चालनमा आउन सकेको छैन’ संघर्ष समितिका संयोजक लोकराज पाण्डे (आगो), सह–संयोजक आनन्दप्रसाद भट्ट र सचिव धर्मसिंह कुँवरद्वारा हस्ताक्षरित ज्ञापनपत्रमा भनिएको छ ।

एमबीबीएस, नर्सिङ, अन्य स्वास्थ्य विज्ञानका अध्ययन कार्यक्रम सञ्चालन, ६ सय शय्याको अस्पताल सञ्चालन, प्रयोगशाला तथा अनुसन्धान केन्द्र स्थापना लगायतका कार्य तत्काल सुरु गर्नुपर्ने माग गरेको छ।