कैलाली । धनगढी उपमहानगरपालिका–१० जुगेडामा संयुक्त राना जनचेतना परिवारको आयोजनामा निसर्ग इन्डो नेपाल जुगेडा कप–२०८२ भलिबल प्रतियोगिता तथा सांस्कृतिक प्रदर्शन कार्यक्रम आजबाट सुरु भएको छ ।
कार्यक्रम खेल संयोजक भगीरथ रानाको अध्यक्षतामा सम्पन्न भएको उद्घाटन समारोहमा सुदूरपश्चिम प्रज्ञा प्रतिष्ठानका उपकुलपति डा टीएन जोशी प्रमुख अतिथि रहेका थिए ।
डा जोशीले खेलकुद र संस्कृति दुबैलाई समान महत्व दिन आवश्यक रहेको उल्लेख गर्दै आयोजक समितिले समुदायकै अग्रसरतामा यस्तो कार्यक्रम सञ्चालन गर्नु प्रशंसनीय कार्य भएको बताए ।
आयोजक समिति सदस्य केबल रानाले नेपाल र भारतका १६ टिमबीच प्रतियोगिता हुने जानकारी दिए । उनले खेलकुद राष्ट्र चिनाउने एउटा प्रभावकारी माध्यम भएको उल्लेख गर्दै सबैलाई सहभागितामार्फत प्रतियोगिता सफल पार्न आह्वान गरे । प्रतियोगितामा प्रथम पुरस्कार १ लाख ६१ हजार , दोस्रो पुरस्कार ८१ हजार र तेस्रो पुरस्कार ४१ हजार रहेको छ ।
उद्घाटन समारोहमा धनगढी उपमहानगरपालिका–७ का वडा अध्यक्ष मोती रानाथारुसहित स्थानीय जनप्रतिनिधि, प्रहरी, सञ्चारकर्मी, खेलाडी, समाजसेवी र बुद्धिजीवीहरूको उल्लेखनीय उपस्थिति रहेको थियो ।
सांस्कृतिक प्रदर्शनतर्फ जुगेडा गाउँको परम्परागत होरी नाच प्रस्तुत गरिएको थियो भने रानाथारु समुदायका मौलिक परिकारसमेत प्रदर्शनीमा राखिएका थिए ।
आयोजकका अनुसार प्रतियोगितामा धनगढी उपमहानगरपालिका–१० वडा कार्यालय संरक्षक र सुदूरपश्चिम खेलकुद परिषद् प्रवर्द्धकको रुपमा रहेका छन् ।
