धनगढी । कार्तिक २१ देखि मंसिर ३ गतेसम्म सम्पन्न सिसिएस प्लस टु क्रिकेट प्रतियोगिता–२०८१ मा उत्कृष्ट प्रदर्शन गर्दै आइपिएस प्लस टु कलेज प्रथम भएको छ । फाइनल खेलमा प्रतिद्वन्द्वी लिटल बुद्धलाई पराजित गर्दै उपाधि हात पारेको उक्त टिमलाई कलेज प्रशासनले नगद पुरस्कार र ट्रफीसहित सम्मान गरेको छ ।
सम्मान कार्यक्रम कलेजका अध्यक्ष हरि रेग्मीको प्रमुख उपस्थितिमा सम्पन्न भएको थियो । अध्यक्ष रेग्मीले खेलकुदमा विद्यार्थीहरूको निरन्तर सक्रियता र सफलताले कलेजको प्रतिष्ठा अझ उकासिएको बताएका छन् ।
प्रतियोगितामा १६ टिमको सहभागिता रहेकोमा आइपिएस प्लस टुले सुरुदेखि अन्त्यसम्म उत्कृष्ट प्रदर्शन गर्दै उपाधि जित्न सफल भएको हो । टिमका खेलाडीहरू शिक्षासँगै अन्य गतिविधिमा पनि समान रूपमा क्रियाशील रहँदै आएका छन् ।
कलेजले कप्तान ललित रसाइली र कोच शुलभ थापासहित टोलीलाई सम्मान गरेको उनले बताए ।
टीममा म्यान अफ द सिरिज र उत्कृष्ट प्रदर्शनसहित बेष्ट ब्याट्सम्यान आर्यान धनपाली बनेका थिए भने सेमिफाइनल तथा फाइनलको म्यान अफ द म्याच हिमाल कुँवर बने ।
प्रतियोगिता अवधिभर टोलीका खेलाडीहरूले म्यान अफ द म्याच उपाधिसमेत हात पारेका छन् ।
कलेजले आगामी मंसिर ८ गतेबाट सिसिएस प्रतियोगिता गर्ने तयारी गरेको अध्यक्ष रेग्मीले बताए ।
