धनगढी । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’लाई धनगढीका १३ वर्षीय हिर्दयान्सु भट्टराईले प्रचण्डको तस्बिर बनाएर उपहार दिएका छन ।
धनगढी उपमहानगरपालिका–१ बस्ने भट्टराईले आफ्नै मेहनतले तयार पारेको तस्बिर शुक्रबार धनगढीमा आयोजित सन्देश सभाका क्रममा संयोजक प्रचण्डलाई हस्तान्तरण गरेका हुन्।
पार्टीको सन्देश सभामा सहभागी हुन धनगढी पुगेका प्रचण्डलाई भेटेर भट्टराईले आफूले बनाएको तस्बिर प्रदान गरेका थिए।
हिर्दयान्सुबाट उपहार स्वरूप आफ्नै तस्बिर प्राप्त गरेपछि प्रचण्डले खुशी व्यक्त गर्दै उनको सिर्जनात्मक प्रतिभाको प्रशंसा गरेका थिए ।
‘यस्ता प्रतिभावान बालकहरूले देशको भविष्य उज्यालो देखाउँछन्। अत्यन्तै मन छुने उपहारका लागि धन्यवाद’ उपहार ग्रहण गर्दै प्रचण्डले भने ।
भट्टराई चित्रकलामा रुची राख्दै आएका छन्। स्केच तथा पोर्ट्रेट बनाउन रुची राख्ने उनीसँग परिवार र विद्यालयले पनि निरन्तर हौसला प्रदान गर्दै आएको बताइएको छ।
हिर्दयान्सु धनगढी उपमहानगरपालिका-८ स्थित एरिष्टो बोर्डिङ हाइ स्कुलमा कक्षा ६ मा अध्यनरत विद्यार्थी हुन ।
