धनगढी । एक हजार चार सय ८५ बालबालिकाले ‘स्वर्ण बिन्दु प्राशन’ खाएका छन् । प्रादेशिक आयुर्वेद चिकित्सालय धनगढीमा चालु आवको हालसम्म उक्त बालबालिकाले ‘स्वर्ण बिन्दु प्राशन’ खाएका हुन् ।
चिकित्सालयका निमित्त मेडिकल सुपरिटेन्डेन्ट डा.ओमप्रकाश कलौनीका अनुसार पछिल्लो समय ‘स्वर्ण बिन्दु प्राशन’प्रति आकर्षण बढ्न थालेको छ ।
उनले भने ‘सुरुमा ‘स्वर्ण बिन्दु प्राशन’ खाने बालबालिकाको सङ्ख्या एकदमै न्युन थियो । पछिल्ला केही महिना यता महिनामा दुई सय हाराहारी बालबालिकाले ‘स्वर्ण बिन्दु प्राशन’ खाने गरेका छन् ।’
सुरुमा यसको महत्व नबुझेर तथा यसबारे जानकारी नपाएका कारण ‘स्वर्ण बिन्दु प्राशन’ खाने बालबालिका कम भएपनि अभिभावकले विस्तार यसको महत्व बुझ्दै जाँदा खाने बालबालिका बढ्दै गएका उनका भनाइ छ ।
एक वर्षदेखि पाँच वर्षसम्मका बालबालिकालाई हरेक महिना पुष्य नक्षत्र परेको दिन ‘स्वर्ण बिन्दु प्रशान’ थोपा खुवाउने गरिएको तथा उमेर अनुसार दुईदेखि चार थोपासम्म खुवाइने गरिएको उनले जानकारी दिए ।
‘स्वर्ण बिन्दु प्राशन’को सेवनले बालबालिका शारीरिक,मानसिक रुपमा स्वस्थ हुने तथा बालबालिकाको रोग प्रतिरोधात्मक क्षमता बढाउने उनले बताए । डा. कलौनीका अनुसार ‘स्वर्ण बिन्दु प्राशन’ स्वर्ण भस्म,बाह्मी तथा मह मिसाएर तयार गरिन्छ ।
उनले ‘स्वर्ण बिन्दु प्राशन’ खाली पेट खादा राम्रो हुने तथा ज्वरो आएको,रुघाखोकी लागेको तथा पखाला लागेको बेला खुवाउन नहुने बताए ।
‘स्वर्ण बिन्दु प्राशन’ निःशुल्क खुवाउने गरिएको प्रादेशिक आयुर्वेद चिकित्सालयले जनाएको छ ।
चिकित्सालले २०८१ चैतदेखि ‘स्वर्ण बिन्दु प्राशन’ खुवाउँदै आएको भएपनि बालबालिका लागि ‘स्वर्ण बिन्दु प्राशन’ राष्ट्रिय निर्देशिका अनुसार गत भदौ ५ गतेबाट औपचारिक रुपमा खुवाउन सुरु गरेको डा.कलौनीले जानकारी दिए ।
