धनगढी । कैलालीको गोदावरी नगरपालिका–५ का कमलसिंह डागा एउटा सानो सटर भाडामा लिएर नास्ता पसल (होटल) सञ्चालन गरिरहेका छन् । अहिले उनको दैनिक आम्दानी पनि राम्रै हुने गरेको छ ।
उनले बिगत डेढ वर्षदेखि नास्ता पसल (होटल) सञ्चालन गर्दै आएको बताए । होटल मेनेजमेन्ट पढेका डागा नेपालमै केही गर्नुपर्छ भनेर दार्चुलाबाट कैलाली झरेर यो व्यवसायमा लागेको बताउछन् ।
उनले हिमशिखर बहुउदेश्यीय सहकारी संस्थाको साथ पाएर व्यवसाय सुधार भएको बताए । सहकारीले गर्दा आफू व्यवसायी बनेको उनको भनाइ छ ।
उनले भने ‘मैले सुरुमा ५÷६ महिना ठेलामा पनि नास्ताको व्यवसाय गरेँ । त्यसबाट आम्दानी पनि थोरै हुन थाल्यो । व्यवसाय विस्तार गर्ने लगानी थिएन् । त्यसपछि मैले सहकारीबाट ऋण लिएर व्यवसाय विस्तार गरे र सटर भाडामा लिएर अहिले व्यवसाय गरिरहेको छु ।’
नास्ता पसल राम्रै चलेको तथा आम्दानी पनि राम्रै हुने गरेको उनको भनाइ छ । उनले भने ‘आम्दानी राम्रो छ । दैनिक सातदेखि आठ हजारको कारोबार हुन्छ । बचत पनि राम्रै हुन्छ । सहकारीलाई पनि धन्यवाद दिन चाहान्छु जसले गर्दा व्यवसाय विस्तारमा सहयोग पुगेको छ ।’
‘सात जनाको परिवार छ । सबै घरखर्च यसै व्यवसायबाट धानेको छु । अन्य आम्दानी केही छैन्’ उनले भने लगनशील भएर काममा लागे सानो लगानीबाट पनि ठूलो मुनाफा कमाउन सकिन्छ भन्ने लागेको छ ।’
सहकारीको किस्ता बुझाउन पनि कुनै समस्या नहुने तथा सटरभाडा तीर्न पनि एकदमै सहज हुने गरेको उनले बताए । उनले भने ‘अब अहिले लिएको ऋण चुक्ता गरेर फेरि सहकारीबाट बढी ऋण लिएर अझै व्यवसाय विस्तार गर्ने योजना छ ।’ मेहनत गरे रोजगारीका लागि विदेशिनु नपर्ने तथा आफ्नै देशमा स्वरोजगार बन्न सकिने उनको भनाइ छ ।
