काठमाडौं– भारतीय प्रतिस्पर्धा आयोगले इन्टरनेट कम्पनी गुगलमाथि झण्डै साढे २१ अर्ब रुपैयाँ जरिवाना गरेको छ । गुगलले एन्ड्रोइड मोबाइल उपकरणको क्षेत्रमा आफ्नो मजबुत उपस्थितिको गलत फाइदा उठाएको आरोप लगाउँदै जरिवाना गरेको जनाएको छ।

साथै आफ्ना अनुचित व्यापारिक गतिविधिलाई रोक्न तथा निश्चित समयसीमामा यस विषयमा समाधान निकाल्न पनि आयोगले निर्देशन दिएको छ । स्मरण रहोस्, भारतीय प्रतिस्पर्धा आयोगले यसअघि एप्पल, गुगल, अमेजन, नेटफ्लिक्स र माइक्रोसफ्ट विरुद्ध सूचना जारी गरेको थियो । ती कम्पनीले डिजिटल क्षेत्रमा प्रतिस्पर्धा विरोधी गतिविधि गरिरहेको र त्यस विषयमा अनुसन्धान हुनु आवश्यक रहेको आयोगको ठहर थियो ।

सोही विषयमा अनुसन्धान गर्न यन्त सिंहाको अध्यक्षतामा वित्तसम्बन्धी संसदीय स्थायी समितिको गठन पनि गरिएको थियो । उक्त समितिले प्रतिस्पर्धाका विभिन्न विषयमाथि विस्तृत अनुसन्धान गरिरहेको छ ।

एन्ड्रोइड अपरेटिङ सिस्टम गुगल स्वामित्वको सबैभन्दा ठूलो स्मार्टफोन अपरेटिङ सिस्टम हो । अन्य कम्पनीले जुन लाइन्सेन्स जारी गर्दछन् ती पनि गुगलद्वारा नै जारी गरिएका हुन्छन् । अनुसन्धानका क्रममा समितिले पाए अनुसार एप्पल र एन्ड्रोइडका बीचमा केही स्तरमा प्रतिस्पर्धा रहे पनि त्यो केवल खरिद गर्ने समयमा मात्र देखिने गरेको छ । एजेन्सी