धनगढी। धनगढी उपमहानगरपालिका–१५ कनरीस्थित धनगढी दुग्ध वितरण आयोजनाले चालु आर्थिक वर्षको बैशाख मसान्तसम्म दुग्धजन्य पदार्थ बिक्रीबाट करिब ६ करोड रुपैयाँ राजस्व संकलन गरेको छ।
आयोजनाले यस अवधिमा १२ लाख लिटर दूध संकलन गरी दूध, दही, मोही, पनिर, घ्यू तथा आइसक्रिमलगायतका दुग्धजन्य पदार्थ उत्पादन तथा बिक्री गरेर उक्त राजस्व संकलन गरेको हो।
आयोजना प्रमुख निरञ्जन भट्टराईका अनुसार सुदूरपश्चिमका कैलाली, कञ्चनपुर र डडेल्धुरा जिल्लाका विभिन्न सहकारी संस्थामार्फत हाल दैनिक करिब ३ हजार लिटर दूध संकलन भइरहेको छ। संकलित दूध आयोजनाकै सवारी साधनमार्फत ढुवानी गरी प्रशोधनपछि विभिन्न दुग्धजन्य उत्पादन तयार पारेर बजारमा बिक्री वितरण गरिन्छ।

हाल आयोजनाबाट उत्पादित सामग्री धनगढी, अत्तरिया, डडेल्धुरा, दिपायल तथा बैशाख महिनादेखि टिकापुर बजारमा समेत बिक्री भइरहेको छ। बिक्री हुन बाँकी दूध भने दुग्ध विकास संस्थानका अन्य आयोजनामा पठाइने गरिएको भट्टराईले जानकारी दिए।
उनका अनुसार कार्तिकदेखि चैत्रसम्मको अवधि दूध उत्पादनको मुख्य सिजन हो। यस समयमा दैनिक ६ हजार लिटरसम्म दूध संकलन हुने गरेको छ। तर बैशाखदेखि असोजसम्म गर्मीका कारण दूध उत्पादन घट्ने भए पनि दही, मोही र आइसक्रिमजस्ता दुग्धजन्य पदार्थको माग बढ्ने गर्दछ। यस अवधिमा दैनिक करिब ३ हजार लिटर दूध मात्र संकलन हुने गरेको छ।
आयोजनाले आगामी दिनमा सुदूरपश्चिमका अन्य पहाडी जिल्लामा समेत दूध संकलन विस्तार गर्ने योजना बनाएको छ। साथै महेन्द्रनगरलगायतका नयाँ बजारमा बिक्री वितरण विस्तार गर्दै सरकारी कार्यालय तथा संस्थाहरूमा गुणस्तरीय दुग्धजन्य पदार्थ उपलब्ध गराउने लक्ष्य राखिएको प्रमुख भट्टराईले बताए।
हाल आयोजनाका आफ्नै दूध संकलन केन्द्र कञ्चनपुरको बेलौरी, कैलालीको लम्की तथा हालै टिकापुर क्षेत्रमा सञ्चालनमा रहेका छन्। आयोजनाले आफ्नै भवनमा सुपथ मूल्य बिक्री केन्द्र स्थापना गरी दूध, दही, मोही, पनिर, घ्यू र आइसक्रिम बिक्री वितरण गर्दै आएको छ। ग्राहकलाई गुणस्तरीय तथा सहज सेवा प्रदान गर्ने उद्देश्यले उक्त केन्द्र सञ्चालन गरिएको जनाइएको छ।

वि.सं. २०६७ सालमा अत्तरियामा स्थापना भएको यो आयोजना २०८२ साल पुस महिनादेखि धनगढी–१५ कनरीबाट सञ्चालन हुँदै आएको छ।