टंक कुँवर

धनगढी । मेहनत, आत्मविश्वास र स्पष्ट योजनासहित अघि बढे बेरोजगार बस्न नपर्ने उदाहरण बनेकी छन् कैलालीको गौरीगंगा नगरपालिका–१ की पूजा रावल।

सात वर्षअघि केवल दुई वटा बंगुरबाट सुरु गरेको व्यवसायलाई उनले अहिले ११० वटा बंगुरसम्म विस्तार गर्न सफल भएकी छन्। धेरै चुनौती र संघर्षका बीच दिनरात खटिएर बंगुरपालन व्यवसायलाई अगाडि बढाएकी रावलले अहिले यही व्यवसायबाट मासिक करिब ७० हजार रुपैयाँ बचत गर्दै आएकी छन्।

उनको खोरमा साना–ठूला गरी ११० वटा बंगुर रहेका छन्। रावलका अनुसार बंगुरका पाठापाठीलाई ४५ दिनसम्म हुर्काएर प्रतिपाठा करिब ७ हजार रुपैयाँमा बिक्री गरिन्छ।

पाठापाठी बिक्रीबाट मात्रै मासिक डेढ लाख रुपैयाँसम्मको कारोबार हुने गरेको उनले बताइन्। सबै खर्च कटाएपछि मासिक ७० हजार रुपैयाँ जति बचत हुने गरेको उनको भनाइ छ।

बंगुर खोरको दैनिक हेरचाह उनका बुबा–आमाले गर्दै आएका छन् भने बजार व्यवस्थापन, ग्राहकसँग सम्पर्क र बिक्री–वितरणको जिम्मेवारी स्वयं रावलले सम्हाल्दै आएकी छन्।

उनले एक जना कामदारलाई मासिक १५ हजार रुपैयाँ तलबमा राखेकी छन्। फुर्सदको समयमा बिहान–बेलुका आफैं पनि व्यवसायमा सक्रिय हुने गरेको बताउँछिन्। “हामी पाँच जनाको परिवारको घरखर्च र बचत यही व्यवसायबाट चलिरहेको छ,” उनले भनिन्।

सात वर्षअघि श्रीमानसँगको सल्लाहमा ‘दिपु कृषि तथा पशुपन्छी पोल्ट्री’ सञ्चालन गर्दै बंगुरपालन व्यवसाय सुरु गरिएको उनले बताइन्। लामो समयदेखि वैदेशिक रोजगारीमा रहेका श्रीमानले विदेश नगई नेपालमै केही गर्नुपर्छ भन्ने सोचका साथ व्यवसाय सुरु गरे पनि पछि कम्पनीको आग्रहमा पुनः विदेश जानुपरेको उनले सुनाइन्।

“एक–दुई महिनापछि श्रीमान घर फर्किनुहुन्छ। त्यसपछि व्यवसायलाई अझै विस्तार गर्ने योजना छ,” उनले भनिन्। रावलका अनुसार व्यवसायबाट उत्पादन भएका बंगुरका पाठापाठी तराईका विभिन्न जिल्ला तथा केही पहाडी क्षेत्रमा समेत बिक्री हुने गरेका छन्। बंगुरपालनसँगै उनले ब्रोइलर कुखुरापालन पनि सञ्चालन गरिरहेकी छन्।

करिब एक वर्षअघि सुरु गरिएको कुखुरापालनबाट धेरै आम्दानी नभए पनि नियमित सञ्चालनमा रहेको उनको भनाइ छ। “कुखुरा मरे पनि बंगुरका लागि चारोको रूपमा उपयोग हुन्छ, बाँचेका कुखुरा स्थानीय बजारमा बिक्री हुन्छन्,” उनले भनिन्। नेपालमै अवसर खोजेर मेहनत गर्न सके राम्रो आम्दानी गर्न सकिने अनुभव सुनाउँदै रावलले युवाहरूलाई पनि स्वदेशमै उद्यमशील बन्न आग्रह गरेकी छन्।