धनगढी । प्रदेश सभाबाट आर्थिक विधेयक पारित हुन नसकेपछि बजेट शून्यताको अवस्थामा रहेको सुदूरपश्चिम प्रदेशमा राजस्व संकलन भने जारी रहने भएको छ ।
आर्थिक मामिला मन्त्रालयले शुक्रबार सूचना जारी गर्दै आर्थिक विधेयक प्रमाणीकरण नभएसम्म सामयिक राजस्व संकलन सम्बन्धी ऐन, २०८१ को व्यवस्था अनुसार राजस्व संकलन गरिने जनाएको हो ।
मन्त्रालयका अनुसार साउन २ गतेदेखि गत आर्थिक वर्षकै आर्थिक ऐनमा तोकिएको दरअनुसार राजस्व उठाइनेछ ।
बजेटसम्बन्धी विवादका कारण प्रदेश सरकारले दोस्रो पटक बजेट शून्यताको अवस्था भोगिरहेको छ ।
प्रदेशको आर्थिक ऐनले निर्धारण गरेका कृषि आयकर, सवारी साधन कर, प्राकृतिक स्रोत रोयल्टी, वन पैदावार कर, मनोरञ्जन कर र पर्यटन शुल्कलगायतका राजस्व यथावत् संकलन हुने मन्त्रालयले जनाएको छ ।
