कैलाली । विश्व हिन्दू परिषद् नेपाल, कैलाली जिल्ला अन्तर्गत कैलारी गाउँ कार्य समितिको आयोजना, गेटा आँखा अस्पताल तथा रुईत फाउन्डेसनको प्राविधिक सहयोग र कैलारी गाउँपालिका–१ को सहकार्यमा कैलारी गाउँपालिकाको हसुलियास्थित दीपेन्द्र माध्यमिक विद्यालयमा एकदिवसीय निःशुल्क आँखा शिविर सम्पन्न भएको छ।
सामाजिक सेवाको उद्देश्यसहित सञ्चालन गरिएको शिविरमा स्थानीयवासीको उल्लेखनीय सहभागिता रहेको थियो। शिविरबाट २१२ जना पुरुष र ४९४ जना महिला गरी कुल ७०६ जनाले निःशुल्क आँखा परीक्षण तथा उपचार सेवा प्राप्त गरेका छन्।
शिविरमा परीक्षणका क्रममा १८१ जनालाई सहुलियत दरमा चस्मा वितरण गरिएको छ भने ५८ जनालाई मोतियाबिन्दुको शल्यक्रियाका लागि गेटा आँखा अस्पतालमा रेफर गरिएको आयोजकले जनाएको छ। साथै, उपचार आवश्यक परेका सबै बिरामीलाई निःशुल्क औषधि समेत वितरण गरिएको थियो।
विश्व हिन्दू परिषद् नेपालले सामाजिक उत्तरदायित्व अन्तर्गत विभिन्न स्थानमा स्वास्थ्य सेवा विस्तार गर्दै आएको छ। यसअघि पनि असार २ गते कञ्चनपुरको भीमदत्त नगरपालिकामा एकदिवसीय निःशुल्क आँखा शिविर सञ्चालन गरी स्थानीय नागरिकलाई सेवा प्रदान गरिएको थियो।
आयोजकका अनुसार यस्ता स्वास्थ्य शिविरले आर्थिक अवस्था कमजोर भएका तथा विशेषज्ञ स्वास्थ्य सेवाको पहुँचबाट टाढा रहेका नागरिकलाई प्रत्यक्ष राहत पुगेको छ। आगामी दिनमा पनि विभिन्न जिल्लामा यस्ता निःशुल्क स्वास्थ्य सेवा कार्यक्रमलाई निरन्तरता दिइने जनाइएको छ।