काठमाडौँ । के तपाईँलाई पिसाब फेर्दा जलन हुन्छ ? र यसलाई सामान्य ठानेर बेवास्ता गरिरहनु भएको छ र ? तपाईँले लामो समयदेखि पिसाब गर्दा जलन महसुस गरिरहनुभएको छ भने यो कुनै रोगको सङ्केत हुन सक्छ । त्यसकारण, यसको कारण बुझ्नु जरुरी छ ।
पिसाब गर्दा जलन हुनु डिहाइड्रेसन मात्रै नभएर योभन्दा बढी गम्भीर समस्याहरूको सङ्केत हुन सक्छ । आजको यस लेखमा हामी पिसाब गर्दा हुने जलनको कारणहरूबारे कुराकानी गर्नेछौं ।
पिसाब नलीमा सङ्क्रमण (यूटीआई)
पिसाब गर्दा जलन हुनुको सबैभन्दा सामान्य र प्रमुख कारण पिसाब नलीको सङ्क्रमण हो । महिलाहरूमा यो समस्या सबैभन्दा धेरै हुन्छ । महिलाहरूको शारीरिक बनावटका कारण तिनीहरूको मूत्रमार्ग छोटो हुन्छ जसले गर्दा ई कोलाई जस्ता ब्याक्टेरियाहरू सजिलै मूत्राशयसम्म पुग्न सक्छन् । बारम्बार पिसाब लाग्नु, दुर्गन्धित पिसाब आउनु र जलन हुनु यसको केही लक्षणहरू हुन सक्छन् ।
यौन सम्पर्कबाट सर्ने सङ्क्रमण
यौन सम्पर्कबाट सर्ने क्लामाइडिया, गोनोरिया र हर्पेस जस्ता सङ्क्रमणहरूले पनि पिसाब फेर्दा जलन महसुस हुन सक्छ । त्यसैले, समय छँदै यी सङ्क्रमणहरूको जाँच गराउन जरुरी छ ।
मिर्गौलाको पत्थरी
तपाईँलाई मिर्गौलाको पत्थरी छ भने पिसाब फेर्दा जलन हुन सक्छ । जब पत्थरी पिसाब नली भएर निस्किँदा जलन महसुस हुन सक्छ । ढाड र कम्मर दुखाइ पनि हुन सक्छ ।
मूत्राशय वा मूत्रमार्गको सूजन
तपाईंको मूत्राशय वा मूत्रमार्ग सुन्निएको छ भने यसका कारण जलन र पीडा जस्ता समस्या हुन सक्छ । तपाईँलाई बारम्बार पिसाब लागेको जस्तो अनुभव हुने वा पिसाब लागेको अनुभव पनि हुन सक्छ ।
पुरुषहरूमा प्रोस्टेट–सम्बन्धित समस्या
पुरुषहरूमा पिसाब गर्दा पोल्नु कहिलेकाहीं प्रोस्टेट बढेको वा प्रोस्टेट ग्रन्थी सुन्निएको कारण पनि हुन सक्छ । यसले पिसाब फेर्दा जलन महसुस हुन्छ र तुरुक्क तुरुक्क पिसाब लाग्न सक्छ । उमेर बढ्दै जाँदा यो अवस्थाको जोखिम बढ्छ ।
पानीको कमी र रासायनिक उत्पादन
कहिलेकाहीँ यो कुनै रोग मात्र हुँदैन । बरु कम पानी पिएको भएर बाक्लो पिसाब आउँछ र यसको कारण जलन बढ्न सक्छ । यस बाहेक पनि बासना आउने साबन, स्प्रे, वा इन्टिमेट प्रडक्टले पनि एलर्जी वा जलन निम्त्याउन सक्छ ।
के गर्ने जलनबाट राहत पाउन ?
समय समयमा प्रशस्त पानी पिइरहनुहोस् ।
केही समयको लागि क्याफिन, रक्सी र मसलादार खानाहरू खान कम गर्नुहोस् ।
कुनै पनि औषधि खानु अघि डाक्टरसँग अवश्य परामर्श लिनुहोस् ।
तपाईँलाई पिसाब गर्दा जलन, ज्वरो, पिसाबमा रगत, वा ढाडमा गम्भीर दुखाइको अनुभव हुन्छ भने, तुरुन्तै डाक्टरसँग परामर्श गर्नुहोस् ।एजेन्सी
