धनगढी । नेपाल विद्युत प्राधिकरण धनगढी वितरण केन्द्रको बक्यौता रकम रु २१ करोड ९० लाख ४९ हजार ३४५ रहेको छ । गत आर्थिक वर्ष २०८२/८३ मा औद्योगिक,घरायसी तथा अन्य ग्राहक र सडकबत्ती बाफत उक्त बक्यौता रकम बाँकी रहेको हो ।
अघिल्लो आर्थिक वर्ष २०८१/८२ को तुलनामा गत आर्थिक वर्षमा रु दुई लाख ६९ हजार ७१८ ले बक्यौता रकम घटेको वितरण केन्द्रका लेखा अधिकृत हर्कबहादुर सिंहले जानकारी दिए । अघिल्लो आर्थिक वर्ष २०८१/८२ मा बक्यौता रकम रु २१ करोड ९३ लाख १९ हजार ६३ रहेको थियो ।
लेखा अधिकृत सिंहका अनुसार गत आर्थिक वर्षमा औद्योगिक ग्राहकको बक्यौता रकम रु दुई करोड २९ लाख ३९ हजार ७९३,घरायसी ग्राहकको रु चार करोड ८७ लाख छ हजार ५२७, अन्य ग्राहकको रु दुई करोड १९ लाख ५८ हजार ६७२ र सडकबत्तीको बक्यौता रु १२ करोड ५४ लाख ४४ हजार ३५३ रहेको छ ।
गत आवमा महसुल नतिर्ने दुई हजार दुई सय ७८ ग्राहकको लाइन काटिएको उनले बताए । उनका अनुसार लाइन काटिएका ग्राहकको महसुल तिर्न बाँकी रकम रु सात करोड १५ लाख ३४ हजार ९३४ रहेकामा रु छ करोड ९९ लाख तीन हजार आठ सय ४६ असुली भएको छ ।
लेखा अधिकृत सिंहका अनुसार अघिल्लो आर्थिक वर्ष २०८१/८२ मा औद्योगिक ग्राहकको बक्यौता रकम रु तीन करोड तीन लाख ९०हजार १५८,घरायसी ग्राहकको रु पाँच करोड आठ लाख २३ हजार ३५४,अन्य ग्राहकको रु एक करोड ८७ लाख २० हजार ४३१ र सडकबत्तीको बक्यौता रकम रु ११ करोड ९३ लाख ८५ हजार १२० रहेको थियो ।
‘अघिल्लो आर्थिक वर्षको तुलनामा गत आवमा केही बक्यौता रकम घटेको छ । वितरण केन्द्रले लामो समय महसुल नबुझाउने ग्राहकको लाइन काटेर रकम असुली पनि गरेको छ’, लेखा अधिकृत सिंहले भने, ‘अन्य ग्राहकबाट रकम नियमित भुक्तानी भइरहेको छ । सडकबत्तीको बक्यौता रकम बढी छ ।’
